Çexiya "Drujba" boru kəməri vasitəsilə Rusiyadan ölkəyə daxil olan neft tədarükünü dayandırıb. 

Valyuta.Az xəbər verir ki, bu barədə "Ceske Noviny" nəşri məlumat yayıb. Ölkə hökuməti və neft emalı şirkəti "Orlen Unipetrol" bu xəbəri təsdiqləyib.  

Mövcud vəziyyət "Mero" şirkəti tərəfindən araşdırılır. Çexiyada neft boru kəmərlərinin operatoru olan bu şirkət bildirib ki, ölkənin ehtiyaclarını təmin etmək üçün kifayət qədər strateji ehtiyatlar mövcuddur. Bununla yanaşı, "Orlen Unipetrol" şirkəti qeyd edib ki, neft İtaliyadan "TAL" boru kəməri vasitəsilə tədarük edilməyə davam edir.  

Rusiyanın "Transneft" şirkəti isə bəyan edib ki, Rusiyanın ərazisində neftin tədarükü adi rejimdə davam edir.  

Məlumat üçün bildirək ki, "Drujba" boru kəmərinin iki əsas qolu var. Şimal qolu Belarus, Polşa, Almaniya, Latviya və Litva ərazilərindən keçir. Cənub qolu isə Ukrayna üzərindən keçərək Çexiya, Slovakiya, Macarıstan və Xorvatiya ərazilərinə tədarük həyata keçirir. Avropa İttifaqı "Drujba" vasitəsilə neft tədarükünü qadağan etməyə çalışsa da, Macarıstan, Slovakiya və Çexiya bu qərara qarşı çıxıb və nəticədə boru kəməri fəaliyyətini davam etdirib.  

Rəhim