"Bank of America" analitikləri Şimali Dəniz "Brent" markalı benchmark neft qiymətləri ilə bağlı proqnozlarını bir barel üçün 90 dollardan 80 dollara endiriblər. 

HİT.az xəbər verir ki, "BofA Global Research"in qlobal əmtəə və törəmə vasitələrinin rəhbəri Fransisko Blanş "Bloomberg"ə müsahibəsində yeni qiymətləndirməni səsləndirib.

Onun sözlərinə görə, neftin qiyməti ilə bağlı proqnozun aşağı salınmasına səbəb ona davamlı xarakter alan tələbin azalması və ABŞ-da hasilatın, eləcə də İrandan tədarükün nəzərəçarpacaq dərəcədə artması olub. Digər amil Venesuela bazarının sürətlə güclənməsidir.

Eyni zamanda, bankın proqnozu neftlə bağlı ən müsbət proqnozlardan biri kimi görünür. "Morgan Stanley" "Brent"in barrelini 77 dollar, "Citigroup"u 75 dollar, "Goldman Sachs" isə 81 dollar/barel qiymətləndirir.

Bazar ertəsi səhər saatlarında "Brent" markalı neftin qiyməti bir barel üçün 76 dollardan aşağı düşüb. Səudiyyə Ərəbistanının bütün alıcılar üçün “Arab Light” brendinin qiymətini bir barel üçün 1,5-2 dollar aşağı salması qərarından sonra neft ucuzlaşıb. Londonun ICE birjasının günorta saatlarına olan məlumatına görə, "Brent" markalı neftin bir barreli 77,73 dollara satılır.

​Paşa Məmmədli