Qlobal neft emalı zavodları dizel yanacağı istehsalında artan çətinliklərlə üzləşir. Dünyada bu yanacaq növünün ehtiyatları artan tələb və təklif çatışmazlığı fonunda son dərəcə aşağı səviyyədədir. 

Valyuta.az xəbər verir ki, bu barədə "Bloomberg" məlumat yayıb.

OPEC+ liderləri Səudiyyə Ərəbistanı və Rusiya tərəfindən neft hasilatının azaldılması vəziyyəti daha da gərginləşdirib, çünki bu növ neftlər əsasən dizel yanacağı istehsalında istifadə olunur. Sentyabrın 5-də hər iki ölkə dizelə tələbin adətən yüksəldiyi ilin sonuna qədər istehsal məhdudiyyətlərini uzadacaqlarını açıqlayıb. OPEC+ kursu dünya bazarına tədarükün sürətlə artmasına imkan verməyəcək. Bu da öz növbəsində inflyasiyanı sürətləndirməyə başlayıb, iqtisadiyyat logistika və sənaye ilə bağlı çətinliklər yaşamağa başladığı üçün ona yeni təkan verib.

Şimal yarımkürəsində isti yay havası bir çox neft emalı zavodlarını yavaş templə işləməyə məcbur edib və ehtiyatları kritik dərəcədə aşağı salıb. Eyni zamanda, pandemiya məhdudiyyətləri götürüldükdən sonra təyyarə yanacağı və benzinə tələbat kəskin artıb və artıq pandemiyadan əvvəlki səviyyəyə yaxınlaşır. Ötən cümə axşamı ABŞ-da dizel yanacağı fyuçersləri 140 dollara çatıb ki, bu da ilin bu vaxtı üçün mütləq rekorddur. Nəşr aydınlaşdırır ki, Aİ-də eyni müddət ərzində dizelin qiyməti 60% artıb.

Ekspertləri dizel yanacağı bazarındakı vəziyyət getdikcə daha çox narahat edir. Beynəlxalq Enerji Agentliyindən Toril Bosoni "Biz qış ayları ərəfəsində bazarda, xüsusən distillatlar üçün davamlı sıxıntı görmə riskimiz var", deyib.

"Goldman Sachs"dan Kallum Brüs isə bildirib ki, emalçılar tələbatı ödəməkdə çətinliklərlə üzləşirlər. Onun sözlərinə görə, onlar dizel yanacağını kənarda qoyaraq, təyyarə yanacağı və benzinə kəskin artan tələbatı ödəməlidirlər.

FGE konsaltinq şirkətindən Eugene Lindell deyir: "Problem tələbdən daha çox təklif məsələsidir". O qeyd edir ki, yayda neft emalı zavodlarında yaranan problemlər səbəbindən Avropada ehtiyatlar olduqca aşağı səviyyədədir, Çin və Rusiyadan dizel ixracı planları çatışmazlığı kompensasiya etmək üçün kifayət deyil.

Həftənin sonunda Rusiya hökuməti daxili bazarda yanacağın qiymətinin sabitləşdirilməsi variantlarını nəzərdən keçirməyə başlayıb.

Paşa Məmmədli