“İşğaldan azad olunmuş ərazilərlə bağlı layihələrin icrasında yeni mərhələyə qədəm qoyulub və bu proseslər dinamik şəkildə davam etdiriləcək”. 

Valyuta.az xəbər verir ki, bu barədə işğaldan azad olunmuş ərazilərin enerji təminatı məsələlərinin həllində zəruri koordinasiyanın təmin edilməsi məqsədilə İdarələrarası Mərkəzdə yaradılmış “Enerji təminatı məsələləri” İşçi Qrupunun videokonfrans formatında növbəti iclasında məlumat verilib.

İclasda, Cəbrayıl rayonunda 330 kV-luq yarımstansiyanın layihələndirilməsinə başlanıldığı diqqətə çatdırılıb.  Eyni zamanda, Hadrut, Cəbrayıl, Füzuli və Zəngilan rayonlarında paylayıcı şəbəkədə aparılan işlər barədə də məlumat verilib. Həmçinin, Şuşada İsa bulağı ərazisində elektrik enerjisi verilişi təmin olunduğu və işğaldan azad edilmiş ərazilərdə kiçik su elektrik stanisyaları ilə bağlı aparılan inventarlaşdırma işləri davam etdirildiyi vurğulanıb.

İşğaldan azad edilmiş ərazilərin enerji təminatında kəsintilərin yaranmaması, qəzaların qarşısının alınması üçün zəruri tədbirlərin görülməsi, müvafiq qurumlar arasında məlumatlılığın daha da artırılması və sıx koordinasiyanın təmin edilməsinin əhəmiyyəti vurğulanıb.

Qeyd edək ki, Azərbaycan Respublikası Prezidentinin 2020-ci il 24 noyabr tarixli Sərəncamı ilə yaradılmış Əlaqələndirmə Qərargahına Prezident Administrasiyasının rəhbəri Samir Nuriyev rəhbərlik edir.