Qarabağ “yaşıl enerji” zonası kimi dünya üçün bir nümunə olacaq. Çünki azad edilmiş torpaqlarda, böyük enerji potensialı var. Prezident İlham Əliyev də dəfələrlə vurğulayıb ki, Qarabağı “yaşıl enerji zonası” kimi görmək istəyir.

“Yaşıl Qarabağ zonası” konsepsiyası çərçivəsində işğaldan azad olunan ərazilərdə elektriklə işləyən avtomobillərdən istifadəsi hədəflənib. Məqsəd ətraf mühiti zəhərli maddələrdən qorumaqdır. Bu kimi layihələrin həyata keçirilməsində isə Belarus şirkəti yaxından iştirak edəcək.

Valyuta.az xəbər verir ki, iqtisadçı Xalid Kərimli RealTV-yə müsahibəsində, müasir dünyada yaşıl enerji zonasının böyük maraq kəsb etdiyini bildirib. 

Onun fikrincə, Azərbaycanın da bu prosesdə iştirakı dayanıqlı inkişaf üçün vacibdir: 

“Yeni qurulan regionlarda isə bunu həyata keçirmək olduqca əlverişlidir”.

İqtisadçının proqnozlarına görə, Qarabağda yaşıl zonanın salınması nəticəsində Azərbaycanın 2030-cu ilə qədər enerji istehlakında bərpa olunan enerji resurslarının rolu 30 faziə qədər artacaq: 

“Bu təcrübə bir sıra ölkələrdə çoxdan mövcuddur. Belə ki, dünyanın enerji bazarında əhəmiyyətli rola malik olan Norveç belə bütün enerji istehlakını alternativ enerjiler hesabına reallaşdırır. Proqnozlara görə isə 2030-cu ilə qədər dünya ölkələrinin alternativ enerjidən istifadəsi 50 faizə qədər çatacaq”.