Vüqar Baba
    "Viva" kommunikasiya agentliyinin təsisçisi, kommunikasiya eksperti

Azərbaycanda İctimaiyyətlə Əlaqələr ixtisası üzrə mütəxəssis yetişdirən təhsil müəssisəsi demək olar ki, yoxdur. Yalnız bir universitetdə PR-a çox yaxın proqram üzrə yaxın illərdə bir ixtisasa başlanıb. Gənclər PR üzrə xaricdə təhsil ala bilirlər.

Ölkədə PR mütəxəssisi qıtlığı səbəbindən nisbətən yaxın peşə sahiblərinin müxtəlif qurumlarda Kommunikasiya, İctimaiyyətlə Əlaqələr, Mətbuat Xidməti şöbə və bölmələrinə işə dəvəti baş verir. Yaxın peşə isə əsasən jurnalistika sayıldığı üçün ən çox mediada işləyən şəxslər PR işlərinə qəbul olurlar.

Belə bir reallıq fonunda qurumlar da “jurnalist işə götürürəmsə, tanınmışını götürüm” məntiqi ilə daha məşhur jurnalistləri, mümkünsə TV simaları olan media mənsublarını işə dəvət etməyi üstün tuturlar. Həmçinin, bu sima quruma əlavə imic qatır. Üstəgəl, qurumun fəaliyyəti ilə bağlı bəzi neqativ hallarda jurnalistlər həmin məşhur simanın xatirinə və ya tanışlıq səbəbindən tənqidi az edər deyə düşünülür. Başlanğıcda bəzən bu işə də yarayır, lakin bu hallarda tez bir zamanda sima “əriyir” – öz nüfuzunu, hörmətini qurum üçün xərcləyir.

Qurumlar peşəkar PR strategiyası ilə kommunikasiyalarını qursalar, bu, onlar üçün daha faydalı və uzunömürlü effektli olar. PR yalnız mediaya açıqlama vermək deyil, qurumla bütün paydaşları (maraqlı tərəflər) arasında əlverişli kommunikasiya qurmaq lazımdır. Həmin, TV aparıcılar isə əgər karyeralarını PR istiqamətində davam etdirmək istəyirlərsə, bu sahədə bilik və bacarıqlarını artırdıqdan sonra işə başlasalar, şəxsi reputasiyalarına belə tez bir zamanda xələl gəlməz.