Xarici ölkələrdə təhsil almaq istəyərkən əsas tələblərdən  biri də dil bilgisi olur. Bir çox ölkələrdə ana dilini bilməyəndə bir il əlavə oxuyub öyrənmək məcburidir. Azərbaycanda da təhsil alan bir çox əcnəbilər var. 

Bəs Azərbaycan dili ölkəmizdə təhsil almaq istəyənlərə əsas tələb kimi qoyulurmu? 

Valyuta.az xəbər verir ki, təhsil eksperti Elmin Nuri Bizim.Media-ya açıqlamasında bildirib ki, Azərbaycanda bir neçə universitetdə əcnəbi tələbələrdən dil sertifikatı tələb olunur: 

“Həmin dil sertifikatını almaq üçün bir il oxumaq lazımdır. Amma tələb olunan dil seritifikatı tədris dilinə aiddir. Üstəlik bu məcburi deyil, amma arzuolunandır. 

Lakin dil sertifikatı olmayanda güzəştlər olur. Mən buna pis baxmıram. Dünyanın bir çox universitetlərində əcnəbiləri cəlb etmək üçün bəzi güzəştlər tətbiq edirlər. Ölkəmizə nə qədər tələbə gələrsə, o qədər xeyrimizədir. Həm də bu universitetin reytinq cədvəlindəki yeri üçün də önəmlidir. Təəssüflər olsun ki, Azərbaycanda əcnəbi tələbələrin sayı çox azdır. Hələ ötən il əcnəbi tələbələrin sayı 10 000 nəfərə çatıb. Gələnlərin də çoxu Türkiyədəndir, yerdə qalanı Güney Azərbaycandan olan soydaşlarımızdır. Əgər dil tələbi məcburi olsa, bu say çox azala bilər”.