Şirkət daxilinə keçirilən iclaslara hər kəs vaxtında çatmağa çalışır. Amma elə məqamlar da olur ki, bəzi işçilər iclasa gecikirlər. Bəzən iclasa gecikən işçilərə rəhbərlik tərəfindən elə iclasda acı, yaxud kinayəli sözlər deyilir. Bu kimi hallar baş verən zaman rəhbərlər işçilərlə necə rəftar etməlidirlər?

Bu barədə Valyuta.az-a danışan İnsan resursları meneceri, şəxsi inkişaf kouçu Aytən Şıxaliyeva deyir ki, gecikmə normal hal olaraq qəbul edilməsə belə, hər kəs zaman-zaman gözlənilməz vəziyyətlərlə qarşılaşa bilər. Ona görə işçiylə öncə empatiya qurmaq və niyə gecikdiyini anlamaq önəmlidir:

“Tıxac, ailə vəziyyəti, texniki və ya hər hansısa digər ciddi problem kimi əsaslı səbəblər ola bilər. İşçini dinləmək və gecikmənin əsaslı səbəbi varsa, bunu nəzərə almaq mənəvi cəhətdən yaxşıdır. Rəhbər gecikmə ilə bağlı işçini iclasda və kollektiv içində tənqid etməməlidir, təkbətək söhbət etməsi daha uyğundur. Görüş zamanı və ya bütün komandanın qarşısında tənqid etmək işçinin motivasiyasına və özünə inamına mənfi təsir göstərə bilər”.

A.Şıxaliyevanın gözlərinə görə, iclaslara davamlı şəkildə gecikən işçilərdə gecikmə vərdiş halına çevrilmiş və vaxtın idarə edilməsi problemi yaşamış ola bilər:

“İşçi ilə təkbətək görüş edib gecikmə səbəbini öyrənmək və ona görə problemin həllinə kömək etmək lazımdır. Həmçinin, bu halın komanda üzərindəki mənfi təsiri işçiyə izah edilməli, iclasların qaydaları və korporativ mədəniyyət haqqında xatırlatmalar edilməlidir. Gələcəkdə oxşar vəziyyətlərin qarşısını almaq üçün gözləntilər açıq şəkildə ifadə edilməlidir”.

Əvəz Həsənov