“Ölkədə istehsal edilən kərə yağı ilə bağlı xammalın əhəmiyyətli hissəsi xaricdən gəlir”.

Bunu Valyuta.az-a açıqlamasında iqtisadçı ekspert Xalid Kərimli kərə yağının qiymətindən danışarkən deyib. Onun sözlərinə görə, ölkədə kifayət qədər inək, camış saxlanılmır:

“Ötən illə müqayisədə kərə yağının qiymətində ucuzlaşma var. Həm kərə yağında, həm də duru yağlarda biz bunu müşahidə edirik. Düzdür, 2019-cu ilin qiymətlərində ciddi yüksəliş var, amma 2020-2021-ci il qiymətlərinə baxanda bir eniş də var”.

Xalid Kərimli bildirib ki, kərə yağının ölkədə istehsalı onun qiymətinin ucuzlaşması anlamına gəlmir:

“Təlabat var deyə idxalın həcmində ciddi artım var. Daxili istehsalda da bir eniş var. Bu onu göstərir ki, əhalinin kərə yağına təlabatı artıb. Təlabatın artması idxalın hesabına əldə olunub. Yerli istehsal isə bu artan təlabatın qarşısında əvvəlki illərlə müqayisədə payı daralıb”. 

Xalid Kərimli əlavə edib ki, bazarda məhsul çox olarsa qiymətlər əlçatan olacaq:

“Təklif həm yerli istehsal, həm də idxal hesabına da ola bilər. Təklif tələbi üstələyəndə qiymətlər daha yaxşı formalaşır. Məhsulun qiyməti formalaşan zaman onun xərcləri, maya dəyəri də əhəmiyyət təşkil edir”.

Qeyd edək ki, Azərbaycanda kərə yağı istehsalı idxalı 42% üstələyib. 2024-cü ilin yanvar-fevral aylarında Azərbaycana 15,6 milyon dollar dəyərində 2968 ton kərə yağı idxal edilib.

Aylin