Elm və Təhsil Nazirliyi xaricdə ali təhsil almaq istəyən tələbələr üçün müsahibələrin tarixi açıqlayıb.

Müsahibələrə aprel ayının ilk günlərində start veriləcək.

Bəs azərbaycanlı tələbələr xaricdə təhsil almaq istəyərkən nəyə diqqət etməli, universitet seçimi edərkən nələrə fikir verməlidir? Bu tələbələr üçün hansı ölkələrdə təhsil əlçatan və uyğun ola bilər?

Bununla bağlı Valyuta.az-a danışan təhsil eksperti Qoşqar Məhərrəmov deyir ki, azərbaycanlı tələbələr xariccdə təhsil almaq istəyərkən əvvəlcə universitetin reytiniqinə diqqət yetirməlidir:

“Onlar universitetlərin öz ölkəsində akreditasiya qurumu tərəfindən akreditasiya edilib edilməməsini yoxlamalıdır. Təhsil almaq üçün müraciət etdiyi ixtisasın da dünyada reytinqinə baxmalıdır.
 
Magistratura oxumaq istəyirsə, tədqiqat aparacağı komanda ilə əvvəldən tanış ola bilər. Həmin ixtisasdan dərs deyən müəllimlər və onların elmi məqalələri ilə də tanış ola bilər. Bütün bunlar tələbənin həm qəbul olma şansını artırır, həm də tələbə onu qarşıda artıq nə gözlədiyini bilmiş olur. Həmin şəxslər növbəti mərhələdə isə oxumaq istədiyi universitetin yerləşdiyi şəhərdə yaşayış şəraiti, ev kirayə qiymətləri, ümumi ictimai iaşə ilə bağlı şərtlərlə tanış ola bilər”.

Azərbaycanlı tələbələr üçün hansı universitetlərdə təhsil əlçatandır sualına cavab olaraq həmsöhbətimiz bildirib ki,  hazırda İstanbul, İzmir, Bursa, Ankara kimi iri şəhərlərdə olan universitetlərdə təhsil almaqla Türkiyə uyğundur:

“Bundan əlavə Polşa, Latviya, Litva, Çexiya, Estoniya kimi ölkələrdə olan univeristetlərdə təhsil xərclər baxımından daha uyğundur. Amma tələbələr dövlət proqramları ilə müraciət edirlərlərsə, inkişaf etmiş ölkələrin universitetlərinə müraciət edib, şanslarını sınamalıdır. Dövlət belə tələbələrin təhsili üçün pul ayırırsa, onlar da ən yaxşısı üçün çalışmalıdır”. 

Davud