Ötən bir neçə il ərzində Xəzər dənizində suyun səviyyəsi 50 sm azalıb. Bunu İranın Su Tədqiqatları İnstitutunun rəhbəri Məhəmməd Rza Kavyanpur deyib.

M.Kavyanpurun sözlərinə görə, nəticədə Xəzər dənizinin 190 milyard kubmetr suyu məhv olub.

O əlavə edib ki, Xəzər dənizində su səviyyəsinin azalmasının əsas səbəbi iqlim dəyişikliyi nəticəsində mövcud olan istilikdir.

Xəzərin səviyyəsinin azalması, suyunun məhv olması, Xəzər dənizi və region üçün təhlükədən xəbər verirmi?

Valyuta.az-a bu haqda danışan ətraf mühit məsələləri üzrə ekspert Rövşən Abbasov deyib ki, Xəzər dənizinin suyunun azalmasının çox saylı fəsadları var:

“İlk növbədə bu, naviqasiya problemlərinə səbəb olur, gəmilərin hərəkətinə problem yaradır. Azərbaycan Ələt limanında gəmilərin sahilə yaxınlaşması üçün xüsusi kanal qazılıb, əks halda gəmilər sahilə yaxınlaşa bilməzdi. Zirə limanında da eyni problem müşahidə olunmaqdadır. Rusiyada isə bu problem daha dərindir. Həştərxan limanında gəmilərin sahilə yan alması çox çətinləşib, ona görə də Rusiya öz gəmilərinin əksəriyyətini Mahaçqala limanına gətirib. Hazırda bununla bağlı Qazaxıstanda da eyni çətinliklər müşahidə edilir. Xəzər dənizinin səviyyəsinin azalması, onun mərkəzi və şimal hissəsində böyük dayazlıqların yaranmasına səbəb olur ki,  bu da naviqasiya problemlərini çətinləşdirir”. 

Ekspert deyib ki, iqlim dəyişmələri ilə Xəzər dənizinin suyunun azalması, tempraturunun artması ilə müşahidə olunur. Tempraturun artması nəticəsində suda olan oksigenin səviyyəsi azalır, bu isə dənizin ekoloji mühitinə, bioloji sərvətlərinə çox ciddi ziyan vurur:

“Bu da dənizdə yaşayan məməli heyvanlar olan suitilərin həyat şəraitini xeyli çətinləşdirir. Dənizdə yaşayan balıqların sayı isə azalıb. Çünki həll edilmiş oksigen olmadan balıqların yaşayışı çətinləşir. Bundan əlavə dənizə tökülən çayların sululuğunun azalması balıqların dənizdən çaylara miqrasiya etməsini çətinləşdirir.Bu da kürütökmə yerlərinin tamamilə sıradan çıxmasına səbəb olur”. 

Davud