“Sınaq imtahan”ı vacibdir, amma bu qədər baha olmamalı, ayda bir dəfə deyil, 3 ayda bir dəfə keçirilməlidir”. 

Valyuta.az-a açıqlamasında bunu təhsil eksperti Kamran Əsədov ibtidai təhsilin aşağı siniflərində “sınaq imtahanları”nın keçirilməsinə zərurətin olub-olmadığına aydınlıq gətirərkən deyib:  

“Sınaq imtahanı” zəruridir. Əldə edilmiş biliklərin, formalaşmış bacarıqların yoxlanılması üçün fərqli bir alət olmalıdır. Orta məktəbin ikinci və üçüncü siniflərində ancaq KSQ (Kiçik Summativ Qiymətləndirmə) mövcuddur. Amma ölkəmizin şagirdlərində imtahan bacarıqları formalaşdırılmır. Kifayət qədər istedadlı uşaq var ki, test tapşırığının cavabını bilir, amma cavab kartına köçürə bilmir. 

Amma ölkəmizdəki “sınaq imtahanları”nda təəssüf ki, kommersiya maraqları ön plandadır. “sınaq imtahanları” 20 manata olmaz. Onun qiyməti 5 manatdan artıq olmamalıdır. Sınaq imtahanı şagirdin bir ay ərzində əldə etdiyi bilikləri yoxlamağa və təkrarlamağa imkan verir. Şagirdlər yalnız 3-4 aydan bir, özünü üç saatlıq imtahan prosesinə hazırlamaq üçün “sınaq imtahanları”nda iştirak etməlidir. İmtahan təkcə biliklilərin və savadlıların meydanı deyil, həm də bacarıqlıların bildiyi işdir”. 
Həmsöhbətimiz bildirir ki, uşaq ayda bir dəfə “sınaq imtahanı”nda iştirak etməklə psixoloji baxımdan sarsılır:

“Ona görə də ibtidai siniflər üçün imtahan modelləri digər siniflərdən vaxt baxımından fərqlənməlidir. 3 saat deyil, ən sadə suallar, rəngli sual kitabçalarından istifadə etməklə və nəticələri fərqli balla hesablanmaqla daha az vaxt ərzində keçirilməlidir”. 

Qeyd edək ki, hazırda Azərbaycan məktəblərində hətta ibtidai siniflərdə oxuyan şagirdlər belə “sınaq imtahanları” verirlər. Özü də ayda bir dəfə olmaqla. Başqa bir tərəfdən, həmin “sınaq imtahan”ları 20 manata başa gəlir. Bu isə bir sıra hallarda valideynlərin narazılığı ilə qarşılanır. 

Rüfət Sultan