“Blogerlər hazırda “Trendyol”un satış nümayəndələri kimi çıxış edir. Bu da geniş yayılmış praktikadır. Qeyri-adi heç nə yoxdur”. 

Bu sözləri Valyuta.az-a iqtisadçı Xalid Kərimli son günlər blogerlərin “Trendyol” onlayn alış-veriş saytlarından paylaşdığı linklər qarşılığında qazandıqları məbləğ haqqında danışarkən deyib.

Xalid Kərimli bildirib ki, blogerlərin nə qədər qazanması ilə bağlı rəqəmlər demək qeyri-ciddi olar: “Çünki bu adi iqtisadi fəaliyyətdir. Digər iqtisadi fəaliyyətlərdən fərqi yoxdur. 

Aldığımız məhsulun dəyərinin blogerə tam ödənilməsi tam absurd fikirdir. “Trendyol”un nəyinə lazımdır ki, məhsul satsın, onun dəyərini də blogerə ödəsin. 

O doğrudur ki, blogerlər bu linkləri paylaşanda alqı-satqının həcminə uyğun olaraq müəyyən komissiya alırlar. Burda “Trendyol” blogerlərin əhatə dairəsindən, informasiyanı yaya bilməsindən istifadə edirlər. Marketinqdə birbaşa satış zamanı müəyyən xərclər olur”. 

İqtisadçı deyib ki, onlar bu qazancından bir mənalı olaraq vergi verməlidir.

Vergilər Məcəlləsində də göstərilir ki, bu cür şəxslər fiziki şəxslər sayılır və bu da sahibkarlıq fəaliyyəti sayılır. Onlar da gəlirlərinin 20 faizə qədərini gəlir vergisi kimi verməlidir. Bunun üçün də VÖEN almalı, qeydiyyatdan keçməli, hesabat verməlidirlər. 

Qeyri-muzdlu işdən olan gəlirdir və Vergilər Məcəlləsinə uyğun olaraq da öhdəliklər müəyyənləşib”. 

Qeyd edək ki, texnobloger Fərid Pərdəşünas öz sosial şəbəkə hesabında qeyd edib ki, ona verilən məlumatlara görə, ötən ay bir neçə bloqer “Trendyol” linklərindən hər biri ayrılıqda 30,000$-dan çox pul qazanıb. Siz blogerlərin paylaşdığı kodlardan istifadə edəndə aldığınız məhsulun tam dəyəri həmin bloqerə ödənilir. İnanılması çətin olsa da, belədir. Ona görə də “Influencer”lərin aqressiv şəkildə link paylaşdığını görürük”.

Davud