Parlamentin son iclasında dövlət büdcəsinin müzakirəsi zamanı deputat Qüdrət Həsənquliyev ölkədə fəaliyyət göstərən bütün universitetlərin özəlləşdirilməsini təklif edib. Onun fikrincə, bu addım büdcəyə qənaət etməyə imkan verər.

Valyuta.az-a açıqlama verən təhsil eksperti Məzahir Məmmədlinin fikrincə, mövcud vəziyyətdə dövlət universitetlərinin özəlləşdirilməsi yolverilməzdir:

“Azərbaycandakı dövlət universitetlərinin bir neçəsi artıq publik hüquqi şəxsə çevrilib. Hansı ki, bu universitetlərin əksəriyyəti də ənənəvi universitetlərdir. Bütün universitetlərin özəlləşdirilməsini təklif edən deputat bununla ola bilsin büdcədən elm və təhsilə ayrılan vəsaitə qənatə edilməsini nəzərdə tutub. Amma elm və təhsilin inkişafı məsələsina belə münasibət sərgilənməməlidir. Azərbaycanda 54 universitet var. Əksəriyyəti də özəl universitetlərdir. Büdcədən təhsil və elmə ayrılan pula ciddi nəzarət edilməlidir ki, düzgün xərclənsin. Özəl universitetlərin bir neçəsini çıxmaq şərtilə əksəriyyətində sovetdən qalma köhnə ənənə davam edir. Dövlət universitetlərilə ayaqlaşmayaraq, yaxşı oxuya bilməyən tələbələr vəziyyətdən çıxmaq daha asan olduğuna görə özəl universitetlərə üz tuturlar. Yəni özəl universitetlərdə belə tələbələr üçün “münbit şərait” var. Dövlət universitetlərinin əksəriyyəti isə artıq müasir dövrün tələblərinə cavab verən səviyyəyə yüksəlib və ya yüksəlmək üzrədirlər. Ona görə də mövcud vəziyyətdə dövlət universitetlərinin də özəlləşdirilməsi birmənalı olaraq yolverilməzdir. Hələlik dövlətin universitetlərə diqqət və qayğısı lazımdır”.

Ramiz