Ötən il sertifikasiya imtahanında keçid balını toplaya bilməyən müəllimlər avqustun 29-da yenidən imtahan verib. Təkrar sertifikatlaşdırma imtahanından 743 müəllim keçə bilməyib. Ötən il imtahandan keçə bilməyənlərin 137-si isə imtahanda iştirak etməyib.

Təhsil eksperti Kamran Əsədov valyuta.az-a açıqlamasında bildirdi ki, imtahandan keçə bilməyən müəllimlərin işinə xitam verilməsi kifayət qədər ədalətlidir: “Bu müəllimlər ixtisasları ilə bağlı minimum suallara cavab verə bilmirlərsə, deməli, onlar heç nə bilmirlər və şagirdlərə də heç nə öyrədə bilməzlər. Təhsil sisteminin səviyyəsinin gücü müəllimlərdən artıq ola bilməz. Təəssüf ki bu qədər müəllim hər gün çox sayda uşağa dərs keçib. Deməli, onların keçdiyi dərslər də keyfiyyətli deyil. Fənnini bilməyən müəllim qarşısındakına da heç nə öyrədə bilməz. Ona görə sertifikasiya ciddi prosesdir. Bu, Azərbaycan təhsilində inqilabi dəyişikliklərin başlanğıcını qoyacaq. Biz artıq təhsil sistemində yeni müəllimləri görəcəyik. Onlar ümumi imtahanlarından yüksək bal toplayıblar”.

K.Əsədov deyir ki, 743 müəllimin ikinci imtahandan keçə bilməməsi ciddi məsələdir: “Təbii ki burada suallar da maraqlıdır. Ancaq hər halda bir fənn müəllimi ona təqdim edilən test tapşırıqlarının yarısına cavab verə bilmirsə, deməli, burada problem var. Ona görə, proses daha da sərtləşdirilməlidir. Biz birmənalı şəkildə kəsilən müəllimləri əmək bazarına buraxan ali təhsil müəssisələri ilə bağlı da ciddi araşdırma aparmalıyıq. 743 ciddi bir rəqəmdir. İmtahanda iştirak edilən müəllimlər arasında, təkrar iştirak edən 2800 müəllim arasında 700 nəfərin bir il ərzində özünü təkmilləşdirməməsi, öz üzərində işləməməsi ciddi bir problemdir”.

Nuray