Bu yaxınlarda Macarıstanda keçirilən 35-ci Beynəlxalq İnformatika Olimpiadası başa çatıb. Azərbaycandan 4 iştirakçı ilə olimpiadaya qatılsa da, cəmi bir şagirdimiz - Fizika, Riyaziyyat və İnformatika təmayüllü liseydən Fuad Qarayev bürünc medal qazanıb.

Halbuki, 2020-ci ildə Azərbaycan 3 bürünc, 2021-ci ildə isə 2 bürünc medala layiq görülüb. 2022-ci ildə isə cari ildə olduğu kimi, cəmi 1 bürünc medal ala bilmişik. Buradan göründüyü kimi, nəticələr ildə-ilə zəifləyir. 

Son olimpiadada qonşu ölkələrin əldə etdikləri nəticələr isə daha yüksəkdir. Ermənistan bu yarışda 3 bürünc, Gürcüstan isə 1 gümüş və 3 bürünc medal qazanıb.

Təhsil eksperti Kamran Əsədov Valyuta.az-a açıqlamasında informatika üzrə beynəlxalq olimpiadalarda əldə edilən nəticələrin zəif olmasını sözügedən fənnə diqqətin azalması ilə əlaqələndirib:

“Təəssüf ki, hazırda ölkədə informatika fənninin tədrisində ciddi problemlər var. Əvvəlki illərdə yalnız fərdi fəaliyyət nəticəsində sözügedən olimpiadada kifayət qədər uğurlu nəticələr əldə etmişik. Son iki ildə ölkədə daha çox diqqət fizika, kimya, biologiya fənlərinə ayrılıb. Ona görə də informatika fənnilə bağlı beynəlxalq olimpiadalarda uğurlu nəticələrimiz azalıb”. 

Həmsöhbətimiz problemin həlli üçün xüsusi qrant layihələrin təşkilini vacib bilir:

“Bu qrant layihələri də informatika fənni üzrə nəticələrin yüksəldilməsinə yönəldilməlidir. Ona görə də informatika fənninin orta məktəblərdə keyfiyyətli tədrisinə nail olmalıyıq. Eyni zamanda, beynəlxalq olimpiadalarla bağlı xüsusi qrant layihələri vacibdir. Yaxşı olar ki, müasir dövrün tələblərinə uyğun olaraq informatika liseyləri də yaradılsın”.

Ramiz