Beynəlxalq alimlər qrupu "Science Advances" jurnalında dünyada plastik tullantıların əsas mənbəyinin hansı korporasiyalar olduğu barədə araşdırma dərc edib. 

Valyuta.az xəbər verir ki, araşdırma 2018-2022-ci illərdə 84 ölkədə aparılıb. Zibilin toplanması və öyrənilməsi ilə bağlı tədbirlərin əksəriyyəti İndoneziya, ABŞ, Tanzaniya, Tailand, Malayziya, Meksika və Filippin ərazisində və sahillərində baş verib. Belə tədbirlərin ümumi sayı 1576 olub.

Alimlər qalıqları plastik tullantılara çevrilən məhsul və qablaşdırma markaları haqqında məlumat toplayıblar. Plastik tullantıların ilk beş mənbəyinə "Coca-Cola" (öyrənilən ümumi məlumatların 11%-i), "PepsiCo" (5%), "Nestle" (3%), "Danone" (3%) və "Altria" (2%) kimi korporasiyalar daxildir. Bu şirkətlər bütün müəyyən edilə bilən plastik tullantıların cəmi 24%-ni istehsal ediblər. Ümumilikdə, üzərində brendləri müəyyən etmək mümkün olan aşkar edilmiş tullantıların demək olar ki, yarısı (48%) cəmi 56 şirkət tərəfindən təmin edilib. Plastik tullantıların 52%-nin markası olmayıb və ya markasını müəyyən etmək mümkün olmayıb.

Ən çox plastik tullantıların hansı sektorda istehsal edildiyi barədə danışan alimlər belə qənaətə gəliblər ki, bunlar içki, qida və tütün məmulatları istehsalçılarıdır. Tədqiqatçılar ümid edirlər ki, tədqiqatın nəticələri təkcə şirkətlərin özləri üçün deyil, həm də plastikdən və ya digər parçalanmayan və ya zəif parçalana bilən materiallardan qablaşdırma istehsalını məhdudlaşdıra bilən tənzimləyicilər, eləcə də səlahiyyətli orqanlar və elm adamları üçün fikir verəcək, yeni, daha ekoloji cəhətdən təmiz qablaşdırma növlərinin inkişafına və yaradılmasına səbəb olacaq.

© Qaynarinfo.az