ABŞ-nin 47-ci seçilmiş prezidenti Donald Trampın andiçmə mərasimi üçün toplanan ianələr 170 milyon dolları keçib. 

Valyuta.Az xəbər verir ki, bu barədə "Bloomberg" nəşri məlumat yayıb.

Mərasimin təşkilati işlərini həyata keçirən komitənin 20 yanvar tarixinə qədər 200 milyon dollardan artıq ianə toplayacağı gözlənilir. Rəsmi mənbələrə görə, mərasim xərclərindən artıq qalan vəsait gələcəkdə qurulacaq prezident kitabxanası üçün istifadə olunacaq.  

Prezidentlərin andiçmə mərasimləri üçün toplanan ianələr, adətən, keçid mərasimləri və balo kimi müxtəlif tədbirlərin xərclərini qarşılamaq məqsədilə istifadə olunur.  

Federal Seçki Komissiyasının məlumatlarına əsasən, Trampın andiçmə komitəsi tərəfindən bu günə qədər toplanan ianələr rekord səviyyəyə çatıb. Bu məbləğ, 4 il əvvəl Cozef Baydenin (Joseph Biden) mərasimi üçün toplanan təxminən 62 milyon dollarlıq vəsaitin təxminən 3 qatıdır.  

Qeyd edək ki, 2016-cı ildə Trampın ilk andiçmə mərasimi üçün təxminən 107 milyon dollar məbləğində ianə edilmişdi.  

Texnologiya nəhənglərinin ianələri

Trampın 2024-cü ilin noyabrında keçirilən prezident seçkilərindəki qələbəsindən sonra ABŞ-ın iri texnologiya şirkətləri də andiçmə mərasimi üçün ianə etməyə başlayıb.  

"Amazon", eləcə də "Facebook" və "Instagram" sosial media platformalarının sahibi "Meta" şirkəti ötən ay mərasim fondu üçün 1 milyon dollar məbləğində ianə edib.  

Bundan əlavə, süni intellekt sahəsində fəaliyyət göstərən "OpenAI" şirkətinin baş direktoru Sem Altman da şəxsi vəsaitindən 1 milyon dollar ianə etməyi planlaşdırdığını açıqlayıb.  

Rəhim