"Amazon"un qurucusu Ceff Bezosun ABŞ-ın Mayami şəhərində yerləşən və "milyarderlər sığınacağı" kimi tanınan İndian Creek adasına köçməsindən sonra 1 milyard dollar vergi qənaəti etdiyi məlum olub.

Valyuta.az xəbər verir ki, dünyanın ikinci ən zəngin adamı olan Ceff Bezos 2023-cü ildə uzun illər yaşadığı Vaşinqton ştatından Floridaya köçməsi ilə diqqət mərkəzinə düşüb. 

"Bloomberg Milyarderlər İndeksi"nə əsasən, 248 milyard dollarlıq sərvətə sahib olan Bezos Mayami şəhərində yerləşən İndian Creek adasında 250 milyon dollar sərmayə ilə üç mülk alıb.

Bezos jurnalistlərə verdiyi açıqlamada sahibi olduğu "Blue Origin" kosmik daşınma şirkətinin fəaliyyətlərinə yaxın olmaq məqsədilə bu qərarı verdiyini bildirib. Lakin maliyyə mütəxəssisləri onun bu addımı maliyyə səbəbləri ilə də əlaqələndirmiş ola biləcəyini qeyd edirlər. 

"Forbes"in məlumatına görə, Bezos Mayamiyə köçdüyündən bəri 13,6 milyard dollar dəyərində "Amazon" səhmi satıb. Əgər Bezos bu səhmləri Vaşinqton ştatında satmış olsaydı, gəlir və kapital vergisi ödəməli olacaqdı. Ekspertlər bu satışdan yaranan vergi məbləğinin 1 milyard dollara yaxın ola biləcəyini bildirirlər.

Floridada isə belə bir vergi mövcud deyil. Bununla da Bezos Floridada 250 milyon dollar dəyərində əmlak sərmayəsi qoyaraq, ümumilikdə 750 milyon dollar qazanc əldə edib.

Mayami şəhərinin mərkəzinə yaxın yerləşən və "milyarderlər sığınacağı" kimi tanınan İndian Creek Village özəl bir adadır. Adaya yalnız Polis Departamentinin nəzarət etdiyi körpü vasitəsilə giriş mümkündür. Bundan başqa, adanın ətrafında sahil mühafizə gəmiləri patrul edir. Bezosun köçməsindən əvvəl belə İndian Creek Village Tom Bredi, İvanka Tramp və Karl Aykan kimi məşhur milyarderlərə ev sahibliyi edirdi. Hətta Qətər əmirinin belə adada mülkə sahib olduğu deyilir. Adada cəmi 40 ev və 89 sakin var.

Paşa Məmmədli