Amerikanın dövlət qurumları "Citigroup"un ABŞ sanksiyaları altında olan rusiyalı oliqarx Süleyman Kərimovla əlaqələrinə görə fəaliyyətini araşdırır.

Valyuta.az xəbər verir ki, bu barədə "Bloomberg" mənbələrə istinadən məlumat yayıb.

Nəşrin həmsöhbətinin sözlərinə görə, ABŞ Ədliyyə Nazirliyi, Federal Təhqiqatlar Bürosu (FTB) və Daxili Gəlirlər Xidməti (IRS) tərəfindən aparılan təhqiqat "Citigroup"a məxsus aktivlərə sahib olan "Heritage Trust" şirkəti ilə işinə yönəlib. 

Mənbə bildirib ki, istintaq "Citigroup"un çirkli pulların yuyulmasına qarşı siyasətini və maliyyə cinayətlərinin qarşısının alınması sistemlərini araşdırır.

Son illərdə Amerika tənzimləyiciləri artıq "Citigroup"u risklərin idarə edilməsində və nəzarət mexanizmlərində çatışmazlıqlara görə cərimələyiblər.

Xüsusilə, iyul ayında ABŞ Federal Ehtiyat Sistemi bankın 2020-ci ildə aldığı iki razılıq əmrini yerinə yetirməkdə kifayət qədər irəliləyiş əldə etmədiyini və 136 milyon dollar cərimə kəsdiyini bildirib.

"Citigroup" bütün mövcud qanun və qaydalara riayət etməyə son dərəcə diqqət yetirməklə bütün işləri aparmağa sadiqdir. Eyni zamanda, hüquqi və tənzimləyici öhdəlikləri yerinə yetirmək üçün zəruri olan əməliyyatlar istisna olmaqla, biz Rusiyadakı demək olar ki, bütün institusional bank biznesimizi aktiv şəkildə dayandırırıq, həmçinin Rusiya istehlak bank işimizi bağlamağa davam edirik", deyə şirkət bildirib.

Rusiyalı oliqarx Süleyman Kərimov Bloomberg Milyarderlər İndeksində 293-cü yerdədir, onun sərvəti təxminən 9,7 milyard dollardır.

Avqust ayında İsveçrənin İqtisadi Məsələlər üzrə Dövlət Katibliyi (SECO) Sülryman Kərimovun 1,3 milyard avro pulunu dondurub. O cümlədən, rusiyalı oliqarxla əlaqəsi olan 4 nəfər cinayət kapitalının yuyulmasında/leqallaşdırılmasında və Ukrayna ətrafındakı vəziyyətlə bağlı İsveçrədə xarici ölkələrə qarşı sanksiyaların tətbiqini tənzimləyən qanunvericiliyi pozmaqda şübhəli bilinir.

Kərimov 2018-ci ildən ABŞ sanksiyaları altındadır. Avropa İttifaqı və Böyük Britaniya Rusiyanın Ukraynaya müdaxiləsindən sonra Kərimovu sanksiya siyahılarına əlavə edib. 2022-ci ilin əvvəlinə qədər Kərimovlar ailəsi Rusiyanın ən böyük qızıl hasilatı şirkəti olan "Polyus PJSC"nin nəzarət paketinə sahib idi.

Paşa Məmmədli