Polşa Avropa İttifaqına üzv olduqdan sonra təxminən 6,2 milyard avro məbləğində ən böyük tranşı alıb.

Valyuta.az xəbər verir ki, bu barədə ölkənin maliyyə və regional siyasət naziri Katarina Pelçinska-Nalenç məlumat verib.

Onun sözlərinə görə, bu məbləğin 3,9 milyard avrosu kredit, 2,3 milyard avrosu isə qrantlardır.

Koronavirus pandemiyasından təsirlənən ölkənin iqtisadi bərpa planı (RRO) çərçivəsində Polşaya 6,2 milyard avro yardım edilib. Bu, Varşavanın ərizəni dekabrın 15-də Brüsselə göndərdiyi birinci mərhələ tranşıdır.

Pelçinska-Nalenç aydınlaşdırıb ki, alınan pul müxtəlif investisiyalara, o cümlədən 1,6 milyard avro Təmiz hava proqramına, 720 milyon avro genişzolaqlı İnternet Xəritəsində Ağ Ləkələr proqramına sərf olunacaq.

Bundan əlavə, vəsait yolların tikintisi və təmirinə, uşaq bağçalarının yaradılmasına, kənd təsərrüfatı məhsullarının emalına sərmayə qoyulmasına yönəldiləcək.

Polşa KPO çərçivəsində növbəti tranşı 2024-cü ilin sonuna qədər alacağını gözləyir.

Paşa Məmmədli