Avropa Komissiyası Amazon-un robot tozsoran bazarında dünya liderlərindən biri olan məişət texnikası istehsal edən iRobot şirkətini 1,7 milyard dollara almasına mane olmağa çalışır. 

Valyuta.az xəbər verir ki, bu barədə mənbələrə istinadən The Wall Street Journal məlumat yayıb.

Onların sözlərinə görə, yanvarın 18-də AK və Amazon arasında danışıqlar aparılıb və bu danışıqlar zamanı avropalı rəsmilər şirkət nümayəndələrinə Aİ-nin böyük ehtimalla sövdələşməni təsdiq etməyəcəyini bildiriblər.

Müqaviləni qadağan etmək qərarı Avropa Komissiyasının 27 komissarının hamısının razılaşdığı təqdirdə veriləcək; onlara fevralın 14-dək vaxt verilir. Nəşr qeyd edir ki, çox güman, hökm AK rəhbərinin müavini, rəqabət üzrə Avropa komissarı Marqret Vestagerin qadağanedici tövsiyəsindən fərqlənməyəcək.

2023-cü ilin iyun ayında Amazon tərəfindən iRobot-un alınmasına dair razılaşma Böyük Britaniyanın rəqabət orqanları tərəfindən təsdiqlənib. Mənbələr bildiriblər ki, hazırda ABŞ Federal Ticarət Komissiyası sövdələşmənin təfərrüatlarını öyrənir.

Noyabr ayında Avropa Komissiyası rəsmi olaraq razılaşma ilə bağlı narahatlığını ifadə edib, çünki satınalma robot tozsoran bazarında ədalətli rəqabətə təhlükə yarada bilər. Aİ rəsmiləri hesab edir ki, Amazon iRobot-un rəqiblərinin məhsullarını şirkətin bazarında satmasına mane olmaq qabiliyyətinə və həvəsinə malik ola bilər. 

Nicat