Rusiya şirkəti rəqiblərindən daha sərfəli qiymət təklif edərsə, Moldova qaz almaq üçün yenidən "Qazprom"a müraciət edəcək. 

Valyuta.az xəbər verir ki, bunu "Jurnal TV"nin efirində ölkənin energetika naziri Viktor Parlikov deyib.

"Əgər "Energocom" (qaz və elektrik enerjisi alan Moldova şirkəti) bazarda "Qazprom"dan aşağı qiymətə qaz tapa bilmirsə, niyə qazı "Qazprom"dan almayaq", deyə Parlikov bildirib.

Bundan əvvəl Parlikov respublikanın artıq "Qazprom"dan qaz almaq niyyətində olmadığını açıqlamışdı. Onun sözlərinə görə, ölkə özünü Avropaya yönləndirib və hətta orada daha sərfəli təklif də tapıb.

Nazir həmçinin bildirib ki, Moldovada 2024-cü ilin fevral ayının sonuna qədər istilik mövsümündə vətəndaşların fasiləsiz təchizatını təmin etmək üçün kifayət qədər qaz ehtiyatı var.

Qeyd olunub ki, Moldovada qaz tarifləri 2022-ci ildən sonra kəskin şəkildə artıb və bu, prezident Maya Sandu və hökumətin istefası tələbi ilə etirazlara səbəb olub.

Paşa Məmmədli