Çinin ixracı 2016-cı ildən bəri ilk illik azalma göstərib. 

Valyuta.az xəbər verir ki, bu barədə "Bloomberg" yazır.

Ötən ilin nəticələrinə görə, Çin dünyanın qalan ölkələrinə 3,38 trilyon dollar dəyərində mal satıb ki, bu da 2022-ci ilin rekord göstəricisindən 4,6% azdır. İdxal 12 ay ərzində 5,5% azalaraq, il ərzində profisiti 823 milyard dollara çatdırıb.

Dekabrda ABŞ-a ixrac ötən ilin eyni dövrü ilə müqayisədə 6,9%, Avropa İttifaqına göndərişlər isə 1,9% azalıb. Yaponiya, Cənubi Koreya və Cənub-Şərqi Asiya da daxil olmaqla regional tərəfdaşlara satışlar da azalıb.

Qlobal tələbatın azalması və qiymətlərin düşməsi dünyanın ikinci ən böyük iqtisadiyyatında artımın əsas sütununu zədələyib. Ölkə daxilində daşınmaz əmlak sektoru hələ də təhlükə altındadır. Deflyasiya ilə bağlı narahatlıqlar da artmaqda davam edir, bu da iqtisadçıların hökumətdən daha çox siyasət dəstəyinə çağırışlarına səbəb olur.

Bu arada, 2023-cü ildə Çin və Rusiya arasında ticarət dövriyyəsi yeni rekorda imza atıb. Bu rəqəm 240,11 milyard dollara çatıb və bu dövr ərzində Çindən ixrac 46,9% artaraq 110,97 milyard dollara yaxın olub.

Paşa Məmmədli