Rusiya prezidentinin mətbuat katibi Dmitri Peskov bildirib ki, Vaşinqton Rusiya aktivlərinin müsadirə edilməsi qərarını dəstəklədiyi barədə Moskvanı xəbərdar etməyib, çünki ölkələr arasında demək olar heç bir əlaqə kanalı yoxdur. 

Valyuta.az xəbər verir ki, Kreml sözçüsü Ağ Evin bəyanatını təxribat adlandırıb.

"Əlbəttə, burada söhbət bizim əmlakımızla bağlı, aktivlərimizlə bağlı qanunsuz hərəkətlərin mümkünlüyünü elan edən təxribat xarakterli bəyanatdan söhbət gedir. Bunun dərin nəticələri olmaya bilməz. Biz bu barədə danışacağıq", deyə Peskov jurnalistlərə bildirib.

"Bloomberg" daha əvvəl Ağ Evin dondurulmuş Rusiya aktivlərinin Ukraynaya yardım məqsədilə köçürülməsinə dair qanun layihəsini dəstəklədiyini yazmışdı. Tədbirin tətbiqinin müzakirəsi G7-nin 2024-cü ilin fevralında, Ukraynada hərbi əməliyyatların başlanmasının ikinci ildönümündən əvvəl keçiriləcək sammitində planlaşdırılır. Aktivlərin köçürülməsi Kiyevə əlavə maliyyə yardımı kimi qəbul edilə bilər.

Yanvarın 6-da Ukrayna prezidenti Volodimir Zelenski müttəfiqlərini aktivlərin ötürülməsi üçün hüquqi bazanın yaradılmasını sürətləndirməyə çağırıb. Avropa İttifaqı nümayəndələrinin bildirdiyinə görə, 2022-ci ilin əvvəlindən qurum təxminən 300 milyard dolları dondurub. Eyni məbləği Rusiya Maliyyə Nazirliyinin rəhbəri Anton Siluanov da qeyd edib.
​
Paşa Məmmədli