2023-cü ilin fevralında baş vermiş zəlzələlərin Türkiyəyə dəymiş ümumi zərəri 110 milyard dollar təşkil edib.

Valyuta.az xəbər verir ki, bunu ölkənin ekologiya və şəhərsalma naziri Mehmet Özhaseki bildirib və Türkiyə ərazisinin 66%-nin seysmik risk zonasında olduğunu deyib.

"Fevralın 6-da baş vermiş zəlzələlərdən ümumi itkilərimiz 110 milyard dollar qiymətləndirilir. Ölkəmizin ərazisinin 66 faizi, vətəndaşlarının 71 faizi birinci və ikinci dərəcəli zəlzələ riski altındadır", - nazir parlamentdə rəhbərlik etdiyi nazirliyin 2024-cü il büdcəsinin müzakirələri zamanı deyib. Onun açıqlamalarından “Pencere” qəzeti sitat gətirib.

Fevralın 6-da Türkiyənin cənub-şərqində 7,7 və 7,6 bal gücündə zəlzələlər baş verib. Minlərlə yeraltı təkanlar geniş ərazidə və qonşu ölkələrdə hiss olunub. Türkiyə hakimiyyəti daha əvvəl zəlzələlərin vurduğu zərərin 100 milyard dolları ötdüyünü bildirmişdi. Fevral zəlzələləri respublikanı zəlzələyə davamlı mənzillərin tikintisinə diqqət yetirərək şəhərsalma siyasətinə yenidən baxmağa vadar edib. Belə planlardan biri seysmoloqların 7 və ya daha yüksək bal gücündə zəlzələ olacağını proqnozlaşdırdığı İstanbula aiddir.

"Biz İstanbulu mümkün zəlzələyə hazırlamaq üçün yol xəritəsi hazırlamışıq. O, beş il ərzində 1,5 milyon binanın təmirini nəzərdə tutur", - nazir deyib. Onun sözlərinə görə, ilkin mərhələdə 300 minə yaxın evin tikintisi nəzərdə tutulan ərazilər artıq seçilib.

Özhaseki daha əvvəl bildirmişdi ki, İstanbulda təxminən 6 milyon ev və 1,5 milyon ofis binası var, onlardan 1,5 milyon mənzil risk altındadır. Nazirin sözlərinə görə, 2024-cü ilin əvvəlində hakimiyyət İstanbulun mənzil fondunun yenilənməsi planını həyata keçirməyə başlayacaq.

Xatırladaq ki, 1999-cu ilin avqustunda Anadolu və Avrasiya tektonik plitələrinin qovşağında yerləşən İstanbul ərazisində 7,6 bal gücündə zəlzələ baş verib. Rəsmi məlumatlara görə, o zaman 17,2 min nəfər, qeyri-rəsmi məlumatlara görə - təxminən 40 min nəfər ölüb, 45 min nəfər yaralanıb.