Bir vaxtlar dünyanın ən böyük şirkəti olan və Amerika sənayeləşməsinin simvolu kimi göstərilən "US Steel" 14,1 milyard dollara Yaponiyanın polad nəhəngi "Nippon"a satılıb.

Valyuta.az xəbər verir ki, "US Steel"in 800 milyon dollarlıq borcunu ödəməyi sözgedən yapon şirkəti öz üzərinə götürəcək. Razılaşma şirkətin verdiyi bəyanatda təsdiqlənib.

1901-ci ildə Andryu Karnegi və JP Morqan tərəfindən qurulan "US Steel" Amerika iqtisadiyyatının sürətli inkişafı və sənayeləşməsindən sonra dünyanın ən böyük şirkətlərindən birinə çevrildi. İkinci Dünya Müharibəsi illərində 340 min işçinin çalışdığı "US Steel" ABŞ-ın müdafiə sənayesində üstün olmasında əsas rol oynayıb. Amerikanın polad sənayesindəki şirkətin effektivliyi zaman keçdikcə digər xarici sənaye birlikləri ilə rəqabət səbəbindən azalmışdı. Hazırda "US Steel"in 14 mini ABŞ-da olmaqla, ümumilikdə 22 min işçisi var.

"Nippon"un mövzu ilə bağlı verdiyi açıqlamada, satınalmanın şirkətin uzunmüddətli perspektivdə ABŞ-da effektivliyini artırmaq məqsədinə xidmət edəcəyi vurğulanıb. Yaponlar həmçinin "US Steel"in işçiləri ilə bağladığı müqavilələrə əməl edəcəklərini və şirkətin adında, markasında heç bir dəyişiklik olmayacağını açıqlayıblar. Həmkarlar ittifaqının prezidenti David Makkall açıqlamasında, "Proses boyu biz bu məşhur Amerika şirkətinin yerlilər tərəfindən satın alınması və idarə edilməsi üçün işləməyə açıq idik, lakin onlar öz fədakar işçi qüvvələrinin narahatlıqlarını bir kənara atmağı seçdilər" - sözlərini söyləyib. 

"US Steel"in həmkarlar ittifaqı son illərdə Vaşinqtonda nüfuzu olan əhəmiyyətli bir siyasi qüvvə kimi ortaya çıxmışdı. Birlik ABŞ-ın keçmiş prezidenti Donald Trampı bir çox ölkədən polad idxalına əlavə vergilər qoymağa razı salmışdı. Trampın tətbiq etdiyi əlavə vergilərin çoxu hazırkı prezident Co Bayden administrasiyası tərəfindən də geri götürülməyib.

GLJ investisiya araşdırma firmasının analitiki Cerald Conson, "Nippon"un bazara girməsinin ABŞ-ın polad sənayesində rəqabəti artıracağını, eyni zamanda çox güman işçilər arasında ixtisarlar aparılması ilə nəticələnəcəyini söyləyib. 

"US Steel"in satışının gələn ilin ikinci və ya üçüncü rübündə başa çatdırılması gözlənilir.

Elmir