"Uzunmüddətli faiz dərəcələrinin 16 ilin ən yüksək səviyyəsinə qədər kəskin yüksəlməsi ABŞ iqtisadiyyatı üçün yumşaq eniş ümidlərini təhdid edir, xüsusən də artımın səbəbləri bəlli deyil". 

Valyuta.az xəbər verir ki, bunu "The Wall Street Journal" yazır.

ABŞ-ın maliyyə naziri Janet Yellen vəziyyətdən narahatlığını ifadə edib, çünki uzunmüddətli istiqrazlar üzrə faiz dərəcələrinin daha yüksək səviyyədə müəyyən edilib-edilməyəcəyi bəlli deyil. Onun sözlərinə görə, bu məsələ onu və prezident administrasiyasını çox narahat edir. Faiz dərəcələrində sıçrayış gələn il ərzində ABŞ və qlobal iqtisadiyyatlarda artımı əhəmiyyətli dərəcədə yavaşlada bilər. Borclanma xərclərinin kəskin artması da maliyyə bazarlarında pozulma riskini artırır.

Ehtimal edilən səbəblərdən biri güclü istehlak tələbi fonunda ABŞ-da iqtisadi artımın yaxşılaşacağı gözləntisidir. İnvestorlar həmçinin böyük dövlət borcunun onların artan həcmdə istiqrazları mənimsəmək qabiliyyətinə təzyiq göstərməsindən narahatdırlar.

FED sədri Jerom Povell etiraf edib ki, faiz artımları hələ də iqtisadiyyatı gözlənildiyi qədər yavaşlatmayıb. Bəzi məmurlar, pandemiya zamanı hökumətin tədbirləri sayəsində iqtisadiyyatın daha dayanıqlı olduğuna inanırlar.

Faizlər artmağa davam edərsə, bu, ABŞ dövlət borcuna xidmət xərclərinin artmasına səbəb olacaq. İpoteka faizləri də artacaq ki, bu da aktiv bazarlarına, investisiyalara və iqtisadi fəaliyyətə təsir göstərə bilər.

Paşa Məmmədli