ABŞ Federal Ticarət Komissiyası “Amazon”u elektron ticarət bazarını inhisara almaqda ittiham edib.

Valyuta.az Bloomberg-ə istinadla xəbər verir ki, ABŞ Federal Ticarət Komissiyası (FTC) texnoloji nəhəngi elektron ticarət bazarını inhisara almaqda ittiham edərək “Amazon”u məhkəməyə verib.

FTC Seattle federal məhkəməsində şirkətə qarşı iddia qaldırıb və daha 17 ştat da ittiham irəli sürüb.

Tənzimləyicinin sözlərinə görə, “Amazon” onlayn ticarətdə rəqiblərinə qarşı yönəlmiş tədbirlərdə iştirak edib. Xüsusilə, tənzimləyicinin fikrincə, pərakəndə satıcı qeyri-qanuni olaraq satıcıları "görkəmli yerləşdirmə" müqabilində onun logistika və digər xidmətlərindən istifadə etməyə məcbur edir və mallarını başqa saytlarda daha aşağı qiymətə yerləşdirən satıcıları cəzalandırır.

"Amazon” inhisarçıdır və o, öz inhisarlarını elə istismar edir ki, alıcılar və satıcılar aşağı xidmətə görə daha çox pul ödəyirlər", - FTC komissarı Lina Xan brifinqdə deyib.

O vurğulayıb ki, satıcılar qazandıqları hər 2 dollardan 1 dolları “Amazon”a ödəyirlər.

Bloomberg-in qeyd etdiyi kimi, “Amazon”a qarşı dava Federal Ticarət Komissiyasının sədri Lina Xanın karyerasında həlledici məqam olub. Bu, həmçinin ABŞ prezidenti Co Bayden administrasiyasının korporativ gücün artan konsentrasiyası ilə mübarizədə qətiyyətini vurğulayır.

Nicat