Sinqapur məhkəməsi bankın müştərisinin aktivlərini fırıldaqçılıqdan qoruya bilmədiyini etiraf edərək, "Credit Suisse"ni milyarder Bidzina İvanişviliyə 742,7 milyon dollar ödəməyə məcbur edib. 

Valyuta.az xəbər verir ki, bu barədə "Bloomberg" məlumat yayıb. Bu ilin iyununda "UBS Bank" ilə birləşməsini başa çatdıran bank məhkəmənin qərarı ilə razılaşmır.

İlkin olaraq məhkəmə prosesi zamanı “Credit Suisse”dən milyarderə olan borcun məbləği bank tərəfindən 926 milyon dollar qiymətləndirilib. Lakin bu ilin mayında məhkəmə bu faktı nəzərə alaraq məbləğin azaldılacağı ilə bağlı xəbərdarlıq edib. Bermud adaları da bu iş üzrə 2022-ci ildə Bidzina İvanişviliyə 600 milyon dollar məbləğində təzminat təyin edən qərar qəbul edib.

"Bloomberg" xəbər verir ki, Sinqapur məhkəməsinin bugünkü qərarı "Credit Suisse" menecerlərindən biri Patris Lekaudronun maxinasiyası ilə bağlı uzanan məhkəmə prosesinin növbəti mərhələsidir. 2016-cı ildə məlum olub ki, o, İsveçrə banklarından birində 2 milyard dollar saxlayan İvanişvilinin xəbəri olmadan öz pullarını digər müştərilərin hesabına onların itkilərini ödəmək üçün köçürüb. Ümumilikdə 2007-2011-ci illər arasında 89 milyon dollar, 24 milyon avro və 9 milyon İsveçrə frankı köçürülüb. 

2017-ci ilin avqustunda Bidzina İvanişvili Sinqapur, Yeni Zelandiya və Bermud adalarında "Credit Suisse"ə qarşı iddialar qaldırıb. İş adamının təqdim etdiyi sənəddə göstərilirdi ki, kredit təşkilatı 2007-2011-ci illərdə dələduzluqdan xəbəri olsa da, bunun qarşısını almaq üçün heç bir tədbir görməyib. 2018-ci ildə Patris Lekaudron dələduzluqda təqsirli bilinib. Bu ilin fevralında "Bloomberg" xəbər vermişdi ki, "Credit Suisse" Bidzina İvanişviliyə 210 milyon dollar ödəyib.

Sinqapur məhkəməsinin bugünkü qərarını şərh edən "Credit Suisse" nümayəndələri “bu qərar qəti deyil” və “apellyasiya şikayəti verəcəyik” deyiblər.

Paşa Məmmədli