Vladimir Putin Norveçin Amedia media şirkətinin “Prime Print” mətbəəsi şəbəkəsindəki paylarını Federal Əmlakın İdarə Edilməsi Agentliyinin idarəçiliyinə keçirib.

Valyuta.az xəbər verir ki, bu barədə Rusiyanın “Forbes” nəşri Putinin fərmanına istinadən yazır.

Putinin fərmanına əsasən, Federal Əmlakın İdarə Edilməsi Agentliyinin rəhbərliyi Amedianın Moskva, Yekaterinburq, Novosibirsk, Çelyabinsk və Voronejdəki “Prime Print”dəki səhmlərini milliləşdirib. Mətbəənin saytındakı məlumata görə, şirkətin Nijni Novqorodda da müəssisəsi var.

Nəşrin məlumatına görə, 2022-ci ilin aprelində Norveç şirkəti Rusiya biznesinə nəzarəti “Novaya qazeta”nın baş redaktoru Dmitri Muratova ötürdüyünü elan edib.

Amedia öz mesajında Rusiya Federasiyasında ümumilikdə altı mətbəənin olduğunu qeyd edib. Dörd mətbəə bütünlüklə Norveç şirkətinə, daha ikisi isə rus minoritar səhmdarları ilə birgə Amediaya məxsus olub.

Amedia həmçinin 38 milyon NOK (4,3 milyon dollar) olan biznesin balans dəyərini sıfıra endirdiyini bildirib.

Norveç şirkəti mətbəələrin gələcəkdə mümkün satışından əldə olunan vəsaiti “Rusiyada müstəqil medianın işini dəstəkləmək” üçün istifadə etmək istəyib.

Amedia Norveçin ikinci ən böyük media şirkətidir və onlarla yerli qəzetə, mətbəəyə və xəbər agentliyinə sahibdir.

Xatırladaq ki, iyulun 16-da Vladimir Putin qida sənayesinin iri aktivlərinin  - "Baltika Brewing Company" MMC və "Danone Russia" ASC-nin "müvəqqəti idarəçiliyə" verilməsi haqqında fərman imzalayıb.

Əvvəllər eyni sxemə əsasən, iki enerji şirkətinin törəmə şirkətləri - Finlandiyanın Fortum Oyj və Almaniyanın Iniper SE Federal Əmlak İdarəetmə Agentliyinin müvəqqəti idarəçiliyinə verilmişdi.

Nicat