Sentyabrın 9-da Yeni Dehlidə keçirilən G20 sammiti çərçivəsində ABŞ prezidenti Co Bayden öz administrasiyasının Hindistan, Yaxın Şərq və Avropanı birləşdirən beynəlxalq dəmir yolu və dəniz dəhlizinin yaradılması məqsədini açıqladı.

Valyuta.az xəbər verir ki, Hindistan-Yaxın Şərq-Avropa İqtisadi Dəhlizi (IMEC) Asiya, Fars körfəzi ölkələri və Avropa arasında əlaqələri və inteqrasiyanı genişləndirməklə iqtisadi inkişafı təşviq etmək məqsədi daşıyır.

Təklif iki alternativ dəhlizi nəzərdə tutur: biri dəniz yolu ilə Hindistanı Birləşmiş Ərəb Əmirliklərində (BƏƏ) Fars körfəzi ilə birləşdirəcək, digəri isə Fars körfəzini BƏƏ-dən quru yolu ilə Səudiyyə Ərəbistanı, İordaniya və İsrail vasitəsilə, sonra isə dəniz yolu ilə Yunanıstanla birləşdirəcək. 

"Infoline Analytics"in baş direktoru Mixail Burmistrov hesab edir ki, hazırda zahirən iqtisadi olan bu layihə daha çox siyasi məqsədlərlə idarə olunur, ən azı ona görə ki, onun həyata keçirilməsi yeni infrastrukturun inkişafına əhəmiyyətli investisiyalar tələb edir. "Geosiyasi riskləri nəzərə almasaq belə, infrastrukturun qurulması illərlə vaxt aparacaq, təkcə layihələndirmə işləri ən azı iki il çəkəcək", deyə Burmistrov bildirib.

Rusiya Elmlər Akademiyasının Hind Okeanı Regionu Mərkəzinin kiçik elmi işçisi Qleb Makareviç bildirib ki, layihənin iştirakçı ölkələr üçün dəyəri bəlli deyil, çünki onlar hazırda Süveyş kanalından istifadə edirlər və ümumiyyətlə dəniz kanalları ilə işləmək daha rahatdır. 

"Zambiya və Konqo Demokratik Respublikası (DRC) kimi Afrika ölkələri çox istiqamətli xarici siyasət yürütməyə çalışır və beləliklə, ABŞ-ın rəhbərlik etdiyi layihədə iştirak etməkdə maraqlı ola bilər". Bunu Afrika Araşdırmaları Mərkəzinin direktoru Andrey Maslov deyib.

"ABŞ-ın Şərqi Afrikadakı mövqeyi zəifdir və buna görə də Vaşinqton Pekinə və ə onun regiondakı güclü təsirinə, o cümlədən Hindistanla qarşılıqlı əlaqə yolu ilə müqavimət göstərməyə çalışacaq", deyə Maslov əlavə edib. 

Paşa Məmmədli