Türkiyə prezidenti Rəcəb Tayyib Ərdoğan bazar günü Ukraynanın Qara dəniz vasitəsilə taxıl ixracına dair razılaşmanın bərpasına yönəlmiş danışıqlarda Rusiyanı “marginallaşdırmamağa” çağırıb.

Valyuta.az “Avropa həqiqəti”nə istinadla xəbər verir ki, Ərdoğanın bəyanatını AFP agentliyi yayıb.

"Qara Dəniz Taxıl Təşəbbüsündə Rusiyanı marginallaşdıran heç bir proses real olmayacaq", - Ərdoğan Yeni Dehlidə keçirilən G20 sammitindən sonra jurnalistlərə deyib.

O, bu məsələ ilə bağlı Rusiya, Ukrayna və Birləşmiş Millətlər Təşkilatının nümayəndələri arasında görüşün keçiriləcəyini dəqiq tarix və yeri göstərmədən elan edib.

BMT və Türkiyənin vasitəçiliyi ilə imzalanan taxıl sazişi Rusiyanın iyul ayında birtərəfli qaydada ondan çıxmasından sonra iflasa uğrayıb. O vaxtdan bəri Moskva dəfələrlə Ukraynanın liman infrastrukturuna hücum edib.

Rusiya prezidenti Vladimir Putin ötən həftə Soçidə Ərdoğanla görüşüb. Türkiyə prezidenti razılaşmanın bərpasına ümid etsə də, buna nail ola bilməyib. 

KİV-in məlumatına görə, bu həftə sonu G20 sammitində Ərdoğan G20 liderlərini Rusiyanın Qara Dəniz Taxıl Təşəbbüsünü bərpa etmək üçün bəzi tələblərini yerinə yetirməyə çağırıb.

Ukrayna Xarici İşlər Nazirliyi bəyan edib ki, “taxıl müqaviləsi”nin bərpası müqabilində Rusiya Federasiyasına qarşı sanksiyalar rejiminin bir hissəsinin zəiflədilməsi Rusiya qida sənayesinin qələbəsi olacaq.

Nicat