İtaliyanın baş naziri Giorgia Meloni özəl olaraq Çinin baş naziri Li Qianq-a bildirib ki, onun ölkəsi Bir Kəmər və Yol Təşəbbüsündən çıxmağı planlaşdırır. 

Valyuta.az xəbər verir ki, bu barədə Bloomberg vəziyyətlə tanış olan mənbəyə istinadən yazır.

Qeyd olunur ki, İtaliyanın 2019-cu ildə rəsmən qoşulduğu investisiya paktı Romanın ABŞ ilə münasibətlərinin sınağına çevrilib. Hindistanda keçirilən G20 sammiti çərçivəsində keçirilən görüşdə Meloni Li-yə bildirib ki, İtaliya Çin lideri Si Szinpin tərəfindən imzalanan təşəbbüsdən geri çəkilməyi planlaşdırır, lakin Pekin ilə dostluq münasibətlərini saxlamağa sadiqdir.

Qəzetin yazdığına görə, İtaliyanın baş naziri ticarət qisasından qorxaraq hökumətinin qlobal infrastruktur paktından çıxmaq qərarını necə çatdıracağına qərar verməyə tələsməyib. Meloni aylardır ki, qisas riskini məhdudlaşdırmaqla belə bir qərarın Pekinə çatdırılması dilemması ilə üzləşib.

Meloni yaxın aylarda Çinə səfər edəcəyini və xüsusilə də Çinin İtaliyadakı səfirinin İtaliyanın müqavilədən çıxmasının onun üçün “mənfi nəticələrə” səbəb olacağı xəbərdarlığından sonra məsələnin həssas olduğunu bildirib.

Qeyd edək ki, bu ilin əvvəlində Bloomberg İtaliya müttəfiqlərinə ilin sonuna qədər bu təşəbbüsdən çıxmaq niyyətində olduğunu açıqladığını bildirib. İtaliya Çinlə bu mübahisəli investisiya müqaviləsində iştirak edən yeganə G7 ölkəsidir. Roma müqavilədən çıxmazsa, iştirak avtomatik olaraq 2024-cü ildə yenilənəcək.

Qeyd olunub ki, İtaliya, əksər Avropa ölkələri kimi, Çinin Rusiyaya daimi dəstəyi fonunda daha da güclənən Vaşinqton və Pekin arasında gərginlik içində qalıb. Birləşmiş Ştatlar İtaliyaya müqavilədən çıxması üçün fəal şəkildə təzyiq göstərib.

2013-cü ildən həyata keçirilən “Bir kəmər və yol” təşəbbüsü çərçivəsində Çin bütün dünyada infrastruktur layihələrinə 900 milyard dollardan çox sərmayə qoyub. Proqram çərçivəsində 70 ölkə və beynəlxalq təşkilatlara investisiyalar yatırılır. Rusiya proqrama Çin xərclərinin əsas alıcılarından biri olub, lakin 2022-ci ildə  Çinin Rusiyaya “Bir kəmər, bir yol” proqramı çərçivəsində investisiyası ilk dəfə olaraq sıfıra enib.

Nicat