Rusiyanın Ukraynaya genişmiqyaslı müdaxiləsi başlayandan bəri ABŞ ilk dəfə olaraq Rusiyaya sanksiya tətbiq olunan oliqarxlardan müsadirə edilmiş aktivləri Ukraynaya keçirəcək.

Valyuta.az xəbər verir ki, bunu ABŞ dövlət katibi Entoni Blinken Ukraynanın xarici işlər naziri Dmitri Kuleba ilə birgə mətbuat konfransında deyib və vurğulayıb ki, “Putinin təcavüzkar müharibəsinə töhfə verənlər bunun əvəzini ödəməlidir”.

“Biz ilk dəfə olaraq, sanksiyaya məruz qalan rus oliqarxlarından müsadirə edilmiş aktivləri Ukraynaya ötürürük və bundan sonra o pullar Ukrayna hərbi veteranlarına dəstək üçün istifadə olunacaq”, - Blinken bildirib.

Söhbət veteranların dəstəklənməsi və reabilitasiyasına yönəldilməsi planlaşdırılan 5,4 milyon dollardan gedir. Vəsaitlər Blinkenin elan etdiyi yardım çərçivəsində Ukraynaya köçürüləcək.

Blinken həmçinin qeyd edib ki, ABŞ Rusiyaya Qara Dəniz Taxıl Təşəbbüsünə qayıtmaq üçün beynəlxalq təzyiq göstərir.

Bundan əlavə, ABŞ digər ölkələrə taxıl tədarükü üçün alternativ marşrutlar yaratmaq üçün Ukrayna ilə işləyir. Dövlət katibi Ukraynaya yardımla bağlı ABŞ-ın mövqeyinin dəyişməzliyinə əmin edib.

“Mənim bu gün ABŞ prezidenti Baydenin adından Ukrayna xalqına mesajım budur: biz sizi son 20 ayda millətinizin sağ qalmasını təmin etmək üçün dəstəklədiyimiz kimi, gələcəyinizi formalaşdırdığınız zaman və azad, möhkəm, güclü, firavan Ukrayna dövləti qurarkən sizə dəstək verəcəyik”, - o yekunlaşdırıb.

Qeyd edək ki, 2022-ci ilin sonunda ABŞ bir sıra mühüm qanunvericilik dəyişikliklərini qəbul edib. Bu dəyişikliklər sayəsində Rusiya təcavüzündə iştirak edənlərdən müsadirə edilən aktivlər Ukraynaya dəstək üçün istifadə oluna bilər.

2023-cü il fevralın 4-də tarixdə ilk dəfə olaraq  müsadirə edilmiş Rusiya aktivlərinin  Ukrayna dövlətinin bərpası lehinə verilməsi razılaşdırılıb.

Nicat