"Baykal gölünün ekoloji vəziyyəti hər il pisləşir, gələcəkdə orada suyun səviyyəsi kəskin azala bilər".

Valyuta.az xəbər verir ki, bunu gazeta.ru-ya ekoloq, “Baykalı xilas edək” layihəsinin rəhbəri Maksim Tokarev deyib.

“Baykalda vəziyyət hər il dəyişir və bu, yaxşılığa doğru deyil. Gölün üzləşə biləcəyi fövqəladə halların qarşısını almaq üçün hər cür səy göstərməliyik. Gölün miqyasını və milyonlarla illik tarixini nəzərə alsaq, 50-100 illik planlaşdırma olduqca qısa bir dövrdür. İnsan fəaliyyəti xüsusilə sahil ərazilərində suyun keyfiyyətinə böyük təsir göstərə bilər. Suyun səviyyəsinin mümkün azalması, bəzi ərazilərin dayazlaşması, torpağın eroziyasına, balıqçılıq sənayesinə təsir göstərə bilər. Əgər hər şey olduğu kimi qalarsa, o zaman zərərli spiroqira yosunlarının yayılmasının artması təhlükəsi, həmçinin endemik heyvan və bitkilərin yoxa çıxması təhlükəsi var”, deyə ekoloq bildirib.

Tokarev qeyd edib ki, hazırda Baykal üçün ən böyük zərər vəhşi turizm, kifayət qədər sayda təmizləyici qurğuların olmaması, həmçinin brakonyerlikdir:

“Baykal gölündə istirahətin cəlbediciliyi artır və ərazidəki mövcud infrastruktur artıq böyük turist axınının öhdəsindən gələ bilmir, buna görə də göl indi müxtəlif yüklərlə üz-üzədir. Məsələn, nəzarətsiz vəhşi turizm - turist düşərgələrinin əksəriyyətində nəinki sönməmiş ocaq qalır, həm də səpələnmiş tullantılar ərazini çirkləndirir, ağaclar kəsilir. Əsas problemlərdən biri də gölün bütün sahili boyu fərdi yaşayış evləri, mehmanxanalar və müəssisələrinin maye tullantılarının emalı üçün təmizləyici qurğuların olmamasıdır".

Tokarevin sözlərinə görə, bu problemləri həll etmək üçün turizm infrastrukturunu yaxşılaşdırmaq, Baykal gölünü qorumaq naminə biznes və əhali üçün vahid qaydalar tətbiq etmək, gölün vəziyyətinin rəqəmsal və ictimai monitorinqini aparmaq lazımdır.

Paşa Məmmədli