Çin sentyabrın 1-dən bir sıra pilotsuz uçuş aparatları (PUA) və müvafiq avadanlıqlara ixrac nəzarətini tətbiq edəcək.

Valyuta.az xəbər verir ki, Çin Ticarət Nazirliyi bu tədbirlərin milli təhlükəsizlik və maraqları qorumaq üçün atıldığını izah edib. Onlar 2015-ci ildə Çində tətbiq edilən ixrac məhdudiyyətlərini tamamlayır və iki il müddətində qüvvədə olacaq.

Xüsusilə, 30 dəqiqə gözdən uzaqda əl ilə idarə oluna bilən PUA-lar yeni məhdudiyyətlərə, bundan əvvəl isə uçuş müddəti bir saata bərabər və ya artıq olan pilotsuz uçuş aparatları qadağa altına düşürdü. Bundan əlavə, pilotsuz təyyarənin maksimal uçuş çəkisi 7 kiloqramdan, faydalı yük olmadan uçuş çəkisi isə 4 kiloqramdan çox olmamalıdır.

Bundan əlavə, maksimum fasiləsiz gücü 16 kilovatdan çox olan dron mühərriklərinin ixracı üçün xüsusi icazə tələb olunacaq. Məhdudiyyətlərə həmçinin dronların tıxanması və infraqırmızı görüntüləmə avadanlığı, lazer nişangahları, sintetik apertura radarları və rabitə avadanlıqları daxildir.

Ticarət Nazirliyi qeyd edib ki, texnologiyaların inkişafı ilə onların tətbiq dairəsi, o cümlədən hərbi məqsədlər üçün də genişlənir. Həmçinin vurğulayıblar ki, ixrac nəzarətinin genişləndirilməsi heç bir ölkə və regiona qarşı yönəlməyib.

Avqustun 8-də Hindistan hərbi PUA istehsalçılarına Çindən gələn hissələrdən istifadə etməyi qadağan edib.

Nicat