Uğurlu Ay missiyasından sonra Hindistan Günəşə ilk kosmik gəmisini göndərmək niyyətindədir. 

Valyuta.az xəbər verir ki, Hindistan Kosmik Tədqiqatlar Təşkilatı (ISRO) sentyabrın 2-də Bakı vaxtı ilə saat 10:20-də baş tutacaq avtomatik Aditya-L1 stansiyasının buraxılışına hazırlaşdığını açıqlayıb.

“Kosmik gəmi Yerdən təxminən 1,5 milyon km məsafədə yerləşən Günəş-Yer sisteminin Laqranj 1-ci (L1) nöqtəsi ətrafında halo orbitə buraxılacaq. L1 nöqtəsi ətrafında halo orbitində yerləşən peykin əsas üstünlüyü Günəşi heç bir maneə olmadan davamlı olaraq müşahidə etməkdir. Bu, real vaxt rejimində günəş aktivliyini və onun kosmik havaya təsirini müşahidə etmək üçün daha böyük üstünlük təmin edəcək”, - agentliyin açıqlamasında bildirilir.

Qeyd edək ki, avqustun 23-də Hindistanın “Çandrayaan-3” stansiyasının eniş modulu Ayın səthinə uğurla enib. Ertəsi gün, avqustun 24-də stansiyaya gətirilən Pragyan rover ilk dəfə Ay səthində səyahət edib. Hindistan Ayın cənub qütbünə yumşaq eniş edən ilk ölkə olub. Bundan sonra avqustun 23-ü Hindistanda Milli Kosmos Günü elan edilib.

Nicat