Son aylar dünyanın bir çox ölkələrinin nüvə (atom) enerjisinə maraq göstərdiklərinin şahidi oluruq. Bu ölkələrinin əksəriyyəti inkişaf etmiş ölkələrdir. Dünyada fərqli zamanlarda nüvə stansiyalarında qəza və fəlakət hallarının yaşanmasına və yaşıl enerji texnologiyalarının bu qədər çox inkişaf etməsinə baxmayaraq, nüvə enerjisinə marağın artmasının səbəbi nədir?

UNEC-in İqtisadiyyat kafedrasının dosenti, professor Emin Qəribli valyuta.az-a açıqlamasında bildirdi ki, marağın artmasının səbəbi dünya enerji bazarlarda tələbin artması və ölkələrin enerji təminatda problemlərin olmasıdır: “2011-ci ildə Yaponiyada “Fukuşima-1” Atom Elektrik Stansiyasında baş verən fəlakətdən sonra nüvə enerjisinə maraq azalmışdı. Lakin dünyada baş verən siyasi-iqtisadi gərginliklə əlaqədar Avropada enerji təminatında problemlər yaranıb. Fransa nüvə enerjisindən hələ də istifadə edir. Almaniyanın bu sahənin bərpası üçün bir çox layihələri var. Yaponiya da bu sahədə müəyyən işlər görür. İran, Türkiyə, Səudiyyə Ərəbistanı gələcəkdə bu enerjidən geniş istifadə etmək istəyir. Çin də yaşıl enerji layihələrinə investisiya yatırsa da, nüvə texnologiyalarından imtina etmir. Dünyada texnologiyalar inkişaf etsə də, ancaq enerji təhlükəsizliyi daha vacib problemlərdən biridir. Bu da nüvə texnologiyalarında istifadəyə vadar edir. Nüvə texnologiyaları gələcəyin texnologiyalarıdır. Ən perspektivli sahələr məhz bu texnologiyaların üzərində qurulacaq. Əgər hər hansı dövlət bu texnologiyaları mənimsəyərsə, gələcəkdə inkişaf edə bilər”.

E.Qəribli deyir ki, yeni texnologiyalar nüvə enerjisini təhlükəsiz üsullarla əldə etməyə şərait yaradır: “Nüvə enerjisi artıq yaşıl enerji sıralarına daxil edilir. 4-cü sənaye inqilabı dövründə də görürük ki, ən mühüm texnologiyalar üçün nüvə önəmli rol oynayır. Bunu təkcə enerji əldə olunmasında deyil, digər sahələrdə də istifadə edirlər”.

Professor bu gün nüvə enerjisinin yaşıl enerjidən daha aktual sahə olduğunu qeyd etdi: “Yaşıl enerji sahəsində elmi tədqiqatlar, həyata keçirilən bütün layihələr eksperimental xarakter daşıyır. Həmçinin bütün yaşıl enerji sahələri, günəş, külək və s. iqlim, hava şəraitindən asılı olan sahələrdir. Bu səbəbdən nüvə enerjisi daha aktual xarakter daşıyır”.

Qarakişi Vəlizadə