Kanada Rabitə Təhlükəsizliyi Təşkilatı (CSE) tərəfindən dərc edilən hesabat ölkənin son 5 ildə dövlət tərəfindən dəstəklənən kiberhücumların hədəfi olduğunu ortaya qoydu. Yayımlanan hesabatda Çinin kiber əməliyyatlarının digər hücumlardan fərqləndirildiyi, ən azı 20 federal qurumun sistemlərinə sızdığı müəyyən edilib.

Çinli hakerlər öz bacarıqlarını bir daha sübut etdilər!

İki ildən bir dərc edilən Milli Kiber Təhlükələrin Qiymətləndirilməsi, Çinin kiberhücumlarının arxasında yüksək səviyyəli siyasi və kommersiya hədəflərinin olduğunu və bu əməliyyatların casusluq, əqli mülkiyyət oğurluğu və transmilli təzyiq üçün istifadə edildiyini ifadə etdi.

Yayımlanan hesabatda diqqət çəkən yeganə məqam Çin deyil. Rusiya və İran kimi ənənəvi kibertəhlükələrlə yanaşı, Hindistan da ilk dəfə olaraq “yenidən yaranan təhlükə” kimi müəyyən edilib. İki ölkə arasında yaşanan diplomatik gərginliyin kiberhücumlarda əks olunduğu bildirilərkən, xüsusilə Sikh fəalı Hardeep Singh Nijjarın öldürülməsindən sonra Kanada ordusu və parlamentinin hind haktivistlərinin hədəfinə çevrildiyi vurğulanıb.

Hesabatda Çin kiber aktyorlarının Kanada şirkətləri və qurumlarından kommersiya baxımından həssas məlumatları oğurladığına dair güclü sübutlar var. Rabitə Təhlükəsizliyi Təşkilatına görə, bu fəaliyyətlər xüsusilə iki ölkə arasında ikitərəfli gərginlik dövrlərində artır. Ekspertlər Çinin Kanadanın rəsmi reaksiyalarını və hadisələri yaxından izləmək üçün bu üsuldan istifadə etdiyini qiymətləndirirlər.

Kanada rəsmiləri aşkar edilmiş bütün sızmaların aradan qaldırıldığını elan edərkən, təcavüzkarların hədəf şəbəkələri öyrənmək üçün əhəmiyyətli vaxt və resurslar sərf etdiklərinə diqqət çəkdilər. Rabitə Təhlükəsizliyi Təşkilatı, Çin və Kanadanın müttəfiqləri arasında iqtisadi gərginlik artdıqca qarşıdakı dövrdə casusluq fəaliyyətinin güclənəcəyini proqnozlaşdırır.

Maya Hüseynova