Valyuta.az-ın “Öyrədən səhvlər” rubrikasının qonağı “Zaferoğlu İnşaat” şirkətinin rəhbəri Zəfər Məmmədovdur.

Zəfər Məmmədov ilk olaraq bildirdi ki, biznes dünyasında səhvlər bağışlanmır. Kiçik diqqətsizlik və ya yanlış qərar illərdir qurduğunuz şirkəti qısa zamanda çökdürə bilər. Buna görə, diqqətli olmaq və hər addımı hesablayaraq atmaq həyati önəm daşıyır.

Z.Məmmədov biznes həyatında dərs aldığı səhvlərindən birini bizimlə bölüşdü: “Əlbəttə ki, mənim də biznes həyatımda səhvlərim olub. Bu səhvlərin başında inam gəlir. Birinə tam şəkildə inanaraq işlərin idarəsini ona buraxmaq, mənim etdiyim ən böyük səhvlərdən biridir. Çünki insan təbiəti etibarsız ola bilər və sözlərlə reallıq çox vaxt üst-üstə düşmür. Vədlərə, boş sözlərə inanmaq yerinə, hər bir razılaşmanı rəsmi müqavilələrlə rəsmiləşdirmək ən düzgün addımdır.

Keçmişdə, yalnız söhbətlərə əsaslanaraq işlərə başlamış, danışıqları yazılı şəkildə təsbit etməmişəm. Nəticədə ciddi maliyyə itkiləri ilə üzləşmişəm. Amma bu itkilər mənə qiymətli bir dərs verdi: inam təkbaşına kifayət etmir. İnsanı, quracağınız iş ortağını hərtərəfli araşdırmaq və qərarları yalnız analizlərə əsaslanaraq vermək mütləqdir.

Bəli, böyük məbləğlər itirdim, amma qarşılığında ölçüyəgəlməz təcrübə qazandım. Bu təcrübə mənə gələcəkdə itirdiyim məbləğin bir neçə qatını qazanmaq fürsəti verdi. Hər bir səhv bir dərsdir. Əsas odur ki, bu dərslərdən öyrənib daha güclü və düşünülmüş addımlarla irəliləyək”.

Aygün