İqtisadiyyat Nazirliyi yanında Əmlak Məsələləri Dövlət Xidməti “Gəncə Qənnadı” ASC-nin dövlətə məxsus və nizamnamə kapitalının 30,03 %-ni təşkil edən səhmlərinin satışı üzrə investisiya müsabiqəsi elan edib.

Valyuta.az Dövlət Xidmətinə istinadən xəbər verir ki, müsabiqə "Dövlət əmlakının özəlləşdirilməsinin II Dövlət Proqramı”na və “İnvestisiya müsabiqəsinin keçirilməsi Qaydaları”na uyğun olaraq elan olunub.

Gəncə şəhəri, Şəmkir şosesi, 1 ünvanında yerləşən müəssisənin özəlləşdirilməsi üçün iddiaçılar investisiya qoyuluşunun istiqamətləri, məbləği və müddəti göstərilməklə azı 400 min manatlıq investisiya proqramı təqdim etməli, yeni iş yerlərinin yaradılması, yeni avadanlıq və texnologiyaların tətbiqi, yeni istehsal sahələrinin yaradılması, istehsal olunan məhsulların çeşidinin artırılması ilə bağlı konkret təkliflərini verməlidir.

Müəssisənin ümumilikdə 2 401 046 manat öhdəlikləri var. Müsabiqənin qalibi nəticələr haqqında protokol təsdiq olunduğu tarixdən 30 gün müddətində alqı-satqı müqaviləsini imzalamalı, müqavilədə razılaşdırılacaq müddətdə təklif etdiyi pul vəsaitini (400 min manat) dövlət büdcəsinə köçürməli, müqavilə ilə müəyyən olunan digər şərt və öhdəlikləri yerinə yetirməlidir.

İnvestisiya müsabiqəsinə çıxarılan dövlət əmlakı ilə //bit.ly/3xUhTuj linki vasitəsilə tanış olmaq olar.

İddiaçıların ərizə və təklifləri avqustu 27-nə qədər (iş günləri saat 10:00-dan 17:30-a qədər) Dövlət Xidmətində (ünvan: Bakı şəhəri, Nizami rayonu, Heydər Əliyev prospekti, 139) qəbul ediləcək. Komissiyanın müsabiqə təkliflərini qiymətləndirməsi qurumun inzibati binasında - avqustun 28-də saat 15:00-dan başlayaraq həyata keçiriləcək.