Yeni başlayanda yaxşı xidmət göstərən, sonra keyfiyyəti düşən bizneslər
Bir çox bizneslər yeni fəaliyyətə başlayan zaman keyfiyyətli xidmət göstərsə də, özlərinə kifayət qədər müştəri qazandıqdan sonra xidmət səviyyəsi aşağı düşür. Məsələn, şirniyyat mağazası açılır, dadlı və keyfiyyətli məhsulları olur, hər zaman ora getməyə çalışırsan, dost-tanışa məsləhət görürsən. Bir müddət sonra baxırsan ki, nə əvvəlki dad, keyfiyyət var, nə də əvvəlki xidmət. Təbii ki zamanla o bizneslər müştərilərini itirirlər və uğursuz olurlar. Sual yaranır: əgər işi keyfiyyətli şəkildə qura bilirlərsə, sonradan niyə belə davranırlar? Biznesin uğursuz olmasını istəyən kimdir?
Valyuta.az-a danışan “Mediamark” Digital Agentliyinin təsisçisi Orxan Rzayev deyir ki, əsas faktor iş böyüdükcə təsisçinin hər detalı nəzərdə saxlaya bilməməsinə bağlıdır: “Biznes fəaliyyətə başlayan zaman təsisçi bir neçə istiqamətdə qərar verir, iş görür və keyfiyyətli iş ortaya qoyulur. Yəni hər detala özü nəzarət edir, yaxşı olması üçün əlindən gələni edir. Amma biznes böyüdükcə, təsisçi bir istiqamətə - idarəetməyə vaxt ayıra bilir. Bu zaman digər istiqamətlərə əməkdaşlar cəlb olunur. İş böyüdükcə maliyyə, marketinq, HR və s. komanda ayrı olur. Zamanla bəzi şirkətlərdə xidmətin keyfiyyətinin aşağı düşməsinin şahidi oluruq. Çünki rəhbər nə qədər də keyfiyyətli mütəxəssis, savadlı insan olsa da, komanda böyüyən zaman onların hər birinin bacarığını öz bacarığına çatdıra və ya öz bacarığı səviyyəsində insanlar tapa bilməz. Sahibkar, CEO yalnız öz səviyyəsində insanlar seçməlidir ki, eyni keyfiyyətdə xidmət göstərə bilsin. Praktikada görürük ki, bu heç də hər zaman mümkün olmur. Buna görə də xidmətdə nisbətən geriləmə yaşana bilir”.
O.Rzayev bildirdi ki, daha zəif bilikdə və təcrübədə insanlar komandaya qoşulduqca, həmin istiqamətlərdə şirkətlərdə axsamalar hiss olunur:
“Bu da əslində normaldır. Burada rəhbərin vəzifəsi odur ki, mümkün qədər ixtisaslı, peşəkarları komandaya cəlb etsin. Şirkətin ilk gündəki dəyərləri ki var, həmin dəyərlərə sadiq qalınmalı və komandaya da bu, aşılanmalıdır. Həmin standartlar mümkün qədər qorunmalıdır. Hansı şirkətlər qoruya bilirsə, üzdə olur və tanınır, bir çox şirkətlərdə isə dediyim səbəblərə görə müəyyən axsamalar olur”.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay