“Biz bir ailəyik” bu ifadəni bir çox şirkətlər işlədirlər. Bununla razılaşanlar da olur, əksini düşünənlər də. Bu ifadə məcazi məna kəsb edir yoxsa, həqiqətən belədir? İş yeri, iş mühiti bir ailədirmi, yoxsa yox?

Biznes təlimçisi İlham Əfəndiyev Valyuta.az-a bu barədə danışarkən qeyd edib ki, hər bir şirkət müxtəlif inkişaf mərhələrindən keçir və şirkət ilk dəfə işə başlayan zaman sahibkar və onun ətrafında olan adamlar ən yaxın adamlar olur. Onlar ailə tipli idarəetmə sistemindən istifadə edirlər: “Orada hər kəs bir-birini tanıyır, çox yaxındılar və ya qohumdurlar. Bu mərhələdə əməkdaşlarına ailə kimi davranmaq böyük prioritetdir. Ola bilər ki, maaşların vaxtında verilməsi ləngiyər və ya tez-tez ofis dəyişmək lazım olar, bu zaman ailə prinsipləri öndə gedir”.

İ.Əfəndiyev şirkətin böyüdükcə artıq idarəetmə üsullarından istifadə etməyə ehtiyacı olduğunu bildirib: “Artıq burda prosedurlar, biznes prosesləri və s. təsvir olunur və onlar daima təkmilləşdirilir. Burda əsas məqsəd insan faktorunu minimuma endirməkdir. Böyük şirkətlərdə ailə prinsipləri deyilsə də, o qədər də ona riayət etmək mümkün olmur. Çünki böyük şirkətlərdə daxili nizam intizam qaydalarına, prinsiplərə, biznes proseslərə və s. tabe olunur”.

Biznes təlimçisi böyük şirkətlərdə də ailə prinsiplərini tətbiq etməyin mümkünlüyündən danışıb: “Bunun üçün sahibkarın - şirkətin başında duran şəxsin öz istəyi olmalıdır ki, mənim prinsiplərim ailə ilə bağlıdır, buna görə də bizim şirkətdə çalışan işçi sayından asılı olmayaraq biz ailə kimi çalışaq. Ailə prinsipləri, dəyərləri, vizyonu, missiyası, məqsədləri təsvir olunur və bunlar hamısı  həmin şirkətin ailə dəyərlərindən uzaqlaşmamasına qulluq edir. Bu halda böyük şirkətlər də ailə prinsipi ilə çalışa bilər”.

“Elə şirkətlər ola bilər ki, ailə prinsiplərinin əsas götürüldüyü deyilsə də, bu proses olmaya da bilər. Bütün proseslər sahibkarın istəyindən, həmin istəyin şirkət daxilində tətbiq olunmasından, şirkətin hansı inkişaf mərhələsində olmasından və asılıdır”- deyə, o, vurğulayıb.

Əvəz Həsənov