Azərbaycanda insanlar çox vaxt nəyə yatırım edəcəklərini bilmirlər. Ən geniş yayılmış yatırım növü əmlak, torpaqdır. Kimi də düşünür ki, bu effektiv yatırım növü deyil. Bir çoxları da qızıla pul yatırmağın tərəfdarıdır. Bunu da məqbul saymayanlar çoxdur. Bir sözlə, bu mövzuda hər ağızdan bir avaz çıxır. Bəs Azərbaycanda insanlar nəyə yatırım etsələr daha effektiv olar? 

İqtisadçı Xalid Kərimli Valyuta.az-a bildirdi ki, Azərbaycanda ola-ola insanlar dünyadakı iri şirkətlərin sıhmlərinə yatırım edə bilərlər. Bu, riskli yatırım növü olsada, gəlirlidir:

“Siz Azərbaycanla məhdudlaşmaya bilərsiniz. Əgər gəlirlərinizin mənbəyi şəffafdırsa, ölkədə investisiya şirkətləri var, investisiya şirkətlərində hesab açıb dünya birjalarında şirkətlərin səhmlərinə yatırım edə bilərsiniz. Dünyadakı iri şirkətlərə - dünya mərkəzi banklarının, iri şirkətlərin istiqrazlarına yatırım edə bilərsiniz. Azərbaycan investisiya şirkətləri də buna xidmət göstərir. Hətta əgər Azərbaycan investisiya şirkətləri sizi qane etmirsə, birbaşa xaricdə fəaliyyət göstərən brokerlərdən də istifadə edə bilərsiniz. Bunların hamısı dil, kommunikasiya, investisiya bilikləri tələb edir”. 

Əgər səhm almaq sizin üçün daha riskli görünürsə və etibar etmirsinizsə, Xalid bəy deyir ki, banklara depozitlər yatıra bilərsiniz:

“Bu bankların hər birində dövlət 100 000 manat və 12 faizə qədər gəlirliyə malik depozitləri sığortalayır. Yəni bankın riskindən asılı olmayaraq dövlət buna təminat verir. Dollarla da 2-3 faizə banklarda yatıra bilərsiniz. Manatda risk yuxarıdır deyə, gəlirlilik də yuxarıdır. Amma dollarda risk aşağıdır, gəlirlilik də aşağıdır”.

X.Kərimli çox da populyar olmayan yatırım növlərindən biri kimi korporativ istiqrazlara pul yatırmağın effektiv ola biləcəyini dedi: 

“Korporativ istiqrazlar var ki, qeyri-populyardır. Amma bunun özü də tədricən inandığınız, etibar etdiyiniz şirkətlərin korporativ istiqrazları da zaman-zaman buraxırlar. Şirkətləri tanıyırsınızsa və arxayınsınızsa, korporativ istiqrazlara da vəsait qoymaq olar”. 

Torpaq, əmlak və qızıla pul yatırmağa gəldikdə isə, iqtisadçı qeyd edir ki, bu yatırım növlərində risk çox azdır deyə gəlir də azdır. Qızılın isə yatırım məqsədi ilə yox, pulu uzun müddət saxlamaq və ya yığmaq üçün yaxşı vasitə olduğunu bildirdi:

“Torpaq və əmlak yatırımın bir növüdür. Kifayət qədər az risklidir, stabil gəlir gətirə bilir. Dünyada da, Azərbaycanda da investisiya sahəsi kimi populyardır. Riski az olduğuna görə, gəliri də azdır. Qızıl da yatırım kimi həddindən artıq risksizdir. Qızıl risksiz olduğuna görə, investorlar üçün daha maraqlı olur. Amma qızıl divident vermir. Sadəcə pulu uzun müddət saxlamaq istəyirsinizsə, etibarlı qorunma vasitəsi kimi baxa bilərik. Qızıl qalxıb düşə bilər. Amma uzun müddətli dönəmdə dəyərini saxlayır”.

Nuray