Amerikada biznes qurmaq Azərbaycandan daha asandır?
Amerikada biznes quranlarla bağlı xəbərləri tez-tez görürük. Hətta azərbaycanlı birinin ağlına biznes ideyası gələndə, onu Amerikada gerçəkləşdirməyə can atır. Səbəbini isə çox vaxt Amerikada biznes qurmağın daha asan olması ilə açıqlayırlar. Bəs Amerikada biznes qurmaqla Azərbaycanda biznes qurmaq arasında nə kimi fərqlər var?
“Murmur technologies” startapının qurucusu Emin Əliyev Valyuta.az-a bu barədə danışdı. O özü də Amerikada biznesini quran azərbaycanlıdır. Emin bəy deyir ki, Azərbaycanda biznes açmaq daha ucuz və tez başa gəlir:
“Azərbaycanda biznes qurmaq, şirkət açmaq daha ucuzdur və daha tez olur, nəinki Amerikada. Amerikada sənə 3 gün lazım olur. Azərbaycanda açanda isə 1 gün kifayətdir. Sənədlərini hazır edirsən, Asan Xidmətə gedirsən, 50 manat ödəyirsən və sənə şirkət açırlar. Amerikada isə şirkət qurmaq üçün bir neçə hüquqi mərhələdən keçməli olursan, daha çox vaxt və pul tələb olunur”.
E.Əliyev deyir ki, Amerikada biznes qurmağın yaxşı tərəflərindən biri pensiya üçün sosial sığorta ödənişinə ehtiyac olmamasıdır:
“Bir şey yaxşıdır ki, Amerikada şirkətin müdirinə işçilərinin pensiya və sosial sığorta ödənişini etmək tələbi qoyulmur. Əgər biznes heç bir qazanc gətirmirsə, gətirmədiyini qeyd edirəm və məndən heç nə tələb olunmur. Amma Azərbaycanda DSMF-ə ödəniş etməlisiniz. Əgər şirkətdə hansısa işçi varsa, onda sən heç nə qazanmasan da, ödəməlisən”.
Həmsöhbətimiz Azərbaycanda müştəri tapmağın çətinliyindən danışdı:
“Amerikada əhali çoxdur deyə nə şirkəti açsan, müştəri tapacaqsan. Azərbaycanda isə əhali azdır deyə müştəri tapmaq daha çətindir. Buna görə, Azərbaycanda biznes açmaq üçün daha spesifik ideyan olmalıdır ki, rəqabətə davam gətirə biləsən. Azərbaycanda o yaxşıdır ki, reklamlar ucuzdur və sən müştəriyə daha tez çata bilərsən. Amma Amerikada reklamlar bahadır, satış zənciri daha uzundur”.
Nuray
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay