“Dövriyyəniz 1 000 000 manatdırsa, 5 manat nizamnamə kapitalı ilə riskləri idarə etmək çətin olacaq” - Nizamnamə kapitalı nədir?
Şirkətlərdə nizamnamə kapitalı önəmlidir.
Hər şirkətdə fərqli məbləğlərdə nizamnamə kapitalına rast gəlirik. 5 manat nizamnamə kapitalı olan şirkət də görürük, milyonlarla nizamnamə kapitalı olan da. Bəzən heç də kiçik olmayan şirkətdə 10-20 manatlıq nizamnamə kapitalı olmasına rast gəlirik. Bəs nizamnamə kapitalı nədir və məbləğlər şirkətlər üçün hansı fərqi yaradır?
İqtisadçı Elşad Məmmədov Valyuta.az-a şirkətlərin nizamnamə kapitalından danışdı:
“Nizamnamə kapitalı müəssisənin açılması üçün tələb olunan vəsaitdir. Yəni həmin müəssisənin təsisçiləri ən azı müəyyən məbləğdə vəsait yatırmalıdırlar ki, o müəssisə və yaxud təşkilat işə başlaya bilsin. Başqa sözlə, bu ilkin kapitaldır. Ondan sonra müəssisə və təşkilat əlavə kapital cəlb edə, kreditlər götürə, genişlənmək üçün işini qura bilər. Amma ilkin başlanğıc üçün təsisçilərin özlərinin yatırdığı kapital olmalıdır”.
Elşad bəy deyir ki, nizamnamə kapitalının çox olması şirkətlər üçün müsbət haldır:
“Nizamnamə kapitalının çox olması şirkətin, müəssisənin imkanlarının da yaxşı olmasını şərtləndirir. Bu fəaliyyət növündən də asılıdır. Elə fəaliyyət növləri var ki, orada böyük nizamnamə kapitalına ehtiyac yoxdur. Elə fəaliyyət növləri var ki, orada nizamnamə kapitalının minimum həddi yüksək qoyulur ki, müvafiq işləri təşkilatlar, müəssisələr görə bilsinlər. Bir də o şirkətlər ki, dövlətdən və yaxud hansısa digər istiqamətlərdən vəsait ala bilir, onların nizamnamə kapitalı o qədər çox olmur. Onlar cəlb edilmiş vəsaitlər hesabına fəaliyyət göstərirlər”.
Bəzən zamanla şirkətlərin nizamnamə kapitalını artırdıqlarını görürük. E.Məmmədov bildirir ki, bu hal şirkətin funksiyalarının artması ilə olur:
“Əgər funksiyalar artırsa, dövriyyə artırsa, əməliyyatların dairəsi genişlənirsə, onda nizamnamə kapitalı artır ki, risklər idarə oluna bilsin. Çünki sizin dövriyyəniz 1 milyon manatdırsa, 5 manat nizamnamə kapitalınız varsa, o riskləri idarə etmək sizə çətin olacaq. Dövriyyəsi çox olan şirkətlər nizamnamə kapitalları az olduqda, xüsusilə faiz dərəcələrinin artması şəraitində maliyyə dayanlıqlığının təmin edilməsində müvafiq problemlərlə rastlaşa bilərlər”.
Nuray
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay