Sahibkarlar idarəçi seçimini necə etməlidir? – Anar Bayramov şərh edir
Təcrübədə çox belə hallar olur ki, idarəçi əvvəl işlədiyi şirkətdə uğurlu olsa da, yeni gəldiyi şirkətdə uğursuzluqla üzləşir. Bəzən isə əksinə, digər şirkətdə o qədər uğurlu olmayan biri yeni təyin edildiyi şirkətdə uğurlu olur. Bu kimi hallar olduğu üçün sahibkarların idarəçi seçimində tərəddüdləri çox olur. Bəs sahibkar idarəçi seçimini necə etməli, nələrə diqqət edilməlidir?
“SAT Group” şirkətinin həmtəsisçisi, idarəçi və biznes konsultant Anar Bayramov Valyuta.az-a sahibkarların idarəçi seçimindən bəhs etdi.
Onun sözlərinə görə, sahibkarlar idarəçini daha çox sektordan axtarırlar, amma bu, o qədər də vacib deyil: “Sahibkarlar idarəçini daha çox sektordan axtarmaqla seçimi xeyli daraldırlar. Əslində sektordan olması yox, idarəçiliyi bilməsi vacibdir. Çünki idarəçiliyi öyrənmək çox vaxt ala bilər. Həmçinin şirkətdə həmin adama idarəçiliyi öyrədə biləcək biri olmayacaq. Amma şirkətdə sektoru bilən kifayət qədər adam var və sektoru öyrənmək elə də böyük zaman almır”.
Anar Bayramov deyir ki, şirkətin dəyərlərinə uyğun idarəçi seçmək daha yaxşı olar: “İdarəçi şirkətin dəyərlərinə uyğun olmadıqda həm idarəçi şirkətə, həm də şirkət işçiləri idarəçiyə uyğunlaşmaqda çətinlik çəkir. Bəzi hallarda müşahidə edirik ki, belə idarəçilər şirkətə gəldikdə, şirkətdəki ab-hava tamam dəyişir. Bundan əlavə, direktor şirkətin vizyonunu paylaşan adam olmalıdır”.
A.Bayramovun sözlərinə görə, idarəçilərdə əsas diqqət edilməli nüanslardan biri də şirkətin gələcəyini düşünməyə meyilli olmasıdır: “Sahibkarla direktor eyni "dalğa"da olmalıdır. Bəzən direktor qısamüddətli nəticələrə fokuslanır, gələcəyi və dayanıqlılığı düşünmür. Amma direktor idarəçidir və idarəçi gördüyü işi şirkətin gələcəyini düşünərək hərəkət etməlidir. Qısamüddətli dövrdə nəticə yaxşı olsa da, bu, şirkətin gələcəyi hesabına olmamalıdır. Gələcəyə "toxumlar" səpilməlidir”.
Anar Bayramov kimlərin idarəçi ola bilməyəcəyini də dedi: “Yalnız 1-2 şirkətdə yetişən adamlar idarəçi ola bilməz. Çünki həmin adamlar digərlərinə baxıb öyrəniblər, idarəçiliyin kökünü bilmirlər. Onlar yeni situasiyaya, mühitə, kollektivə düşəndə çaşıb qalırlar. Bəzən böyük şirkətdən idarəçi gətirirlər, düşünürlər ki, böyük şirkətdə işləyibsə, uğurludur, amma gəlib uğursuz olur. Əslində isə uğurun kökü böyük şirkətdəki sistem idi. Hazır sistemin içində uğurlu olanlar, özləri sistem qura bilmirlər. Çünki bu onlar üçün yeni hal olur, öyrəşməyiblər”.
Nuray
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay