Yetkin və effektiv menecer olmaq balans yaratmaq tələb edir. Əks halda yarımçıqlıq olur və performans axsayır. Bəs nələrin balansından söhbət gedir?

Valyuta.az - idarəçi, “SAT Group” şirkətinin həmtəsisçisi və biznes konsultant Anar Bayramovun yazısını təqdim edir.

1. Balanslı dəyər yaratmaq - İdarəçi təkcə maliyyə göstəricilərinə fokuslanmalı deyil. Biznesin digər perspektivləri (müştəri, HR, proses və s.) də diqqətdə saxlanılmalıdır. Əks halda şirkət birtərəfli inkişaf edir və dayanıqlılıq sual altında olur.
2. Biznes funksiyalarının balansı - İdarəçi müxtəlif biznes funksiyalarının (satış, maliyyə, marketinq, əməliyyat, HR və s.) mahiyyətini bilməli, qərar verəndə kompleks yanaşma olmalıdır. Məsələn, satış yönümlü rəhbər təkcə satışı yox, işin maliyyə, insan, əməliyyat və s. tərəflərini də nəzərə almalıdır.
3. İdarəetmə funksiyalarının balansı - İdarəetmənin əsas funksiyaları (planlama, təşkiletmə, liderlik, nəzarət) balansda olmalıdır. Hamısı yaxşı işləməlidir ki, kifayət qədər effektivlik olsun.
4. İdarəetmə bacarıqlarının balansı - Texniki, emosional və konseptual bacarıqların balansına nail olmaq lazımdır.
5. İdarəetmə üslublarının (demokratik, avtoritar və s.) balansı.
6. Steykholderlərin maraqlarının balanslaşdırılması - Şirkətin çox vaxt fərqli steykholderlərinin fərqli və konfliktli maraqları olur. İdarəçinin işidir ki, bu konfliktli və çeşidli maraqlar balanslaşdırılsın, hamısı imkan daxilində razı salınsın.
7. Uzunmüddətli və yaxınmüddətli perspektivdən balans - Həm qısamüddətli performansı düşünməliyik, həm də uzunmüddətli. Qərar verəndə hər ikisi nəzərə alınmalıdır. İndidən gələcək üçün “toxumlar” atılmalıdır (kadr hazırlığı, innovasiya, davamlı təkmilləşmə, markaya investisiya və s.) ki, şirkət dayanıqlı və rəqabətli ola bilsin.