Biznesə başlayanda, biznesin çətinlikləri olanda sahibkarların bir həll yolu da borc, kredit götürmək olur. Batan biznesləri belə, borclarla xilas etməyə çalışan sahibkarlar da az deyil. Nəticədə külli miqdarda borcları yığılan sahibkaları görə bilirik. Bəs biznes adamlarının borclanmaya yanaşması necə olmalıdır?

İdarəçi, “SAT Group” şirkətinin həmtəsisçisi və biznes konsultant Anar Bayramovun Valyuta.Az-a açıqlamasına görə, borcla biznesə başlamaq kifayət qədər normaldır: “Şirkətin fəaliyyətə başlaması üçün iki cür maliyyələşmə növü var: borc və sahibkar kapitalı hesabına. Situasiyadan asılı olaraq bunların hər biri seçilə bilər. Bəzi sahələr investisiya tutumlu olduğuna görə, biznesə başlamaq çox vəsait tələb edir. Məcbur bir hissəsinin borcla maliyyələşməsinə ehtiyac duyulur. Buna neqativ baxa bilmərik, normal haldır”.

Eləcə də bax: Çox pul xərcləməyin, borc almağa meyilliyin səbəbi nədir?

Biznesə başlamaq üçün hansı məbləğdən yüksək borc normal sayılmır? Anar Bayramov bildirdi ki, borcun yüksək həddi quracağınız biznesdən asılıdır: “Borcun optimal həddi situasiyadan, sektordan və şirkətdən asılıdır. Burada əsas məsələ odur ki, düzgün bazar araşdırması olsun, düzgün hesablansın ki, həmin borc nə qədər müddətə qaytarıla biləcək. Düzgün proqnozlaşdırmaq lazımdır ki, şirkətin nə qədər gəliri olacaq ki, həmin borc qaytarıla bilsin. Yəni borc əsaslandırıla bilən səviyyədədirsə, ziyanı yoxdur”.

Eləcə də bax: 1000 manatla biznes quraq, yoxsa kursa gedək?

Biznes adamlarının ən çox borclanmaları bizneslərin batan dövründə olur. Borclarla xilas etməyə çalışırlar, ancaq alınmır. Anar Bayramov, təcrübəsində hətta borcla batan biznesi xilas edənlərə də rast gəldiyini söylədi: “Biznes adamı borc götürürsə, təbii ki məntiqli şəkildə yanaşaraq bunu edir, yəni etməlidir. Batmaqda olan biznesi borc, kreditlə maliyyələşdirmək arzuolunan deyil. Çünki biznes batır və sən üstəlik üzərinə əlavə borclar götürmüş olursan. Məntiqli şəkildə addım atıb, bu dönəmdə də müəyyən bir limiti keçməmək şərtilə borc götürmək olar. Çünki bəzən həqiqətən də başqa çarə olmur. Təcrübədə də görmüşəm ki, bəzi hallarda batan biznesi borcla xilas etmək mümkün olub. Yəni ölçülmüş addımlar atmaqla, buna da getmək olar. Ancaq sən borc götürüb ayaqda saxlamağa çalışırsan, amma biznes batmağa davam edirsə, davamlı borclarla ayaqda saxlamaq düzgün deyil”.

Nuray